अजबच! हा देश पॉर्नमधून करणार कमाई, त्या पैशात ड्रोन खरेदी करणार…युद्ध जिंकण्याची वेगळीच रणनीती?
अॅडल्ट कंटेंट क्रिएटर्स, विशेषतः ‘OnlyFans’ मॉडेल्सची संख्या गेल्या काही वर्षांत मोठ्या प्रमाणात वाढली आहे. पण सध्याच्या कायद्यामुळे एक विचित्र परिस्थिती निर्माण झाली होती. एक देश यामधून कमाई करुन मिळालेल्या पैशातून ड्रोन खरेदी करणार आहे.
रशियाविरुद्ध सुरू असलेल्या भीषण युद्धात पैशांची टंचाई भासत असलेला युक्रेन आता मोठी रक्कम उभी करण्यासाठी एक अनोखे आणि मोठे पाऊल उचलणार आहे. ‘द वॉल स्ट्रीट जर्नल’ (WSJ) च्या अहवालानुसार, झेलेन्स्की सरकार देशात बंदी असलेल्या अॅडल्ट एंटरटेनमेंट आणि पॉर्नोग्राफी उद्योगाला कायदेशीर करून त्यावर कर आकारण्याचा विचार करत आहे. सध्या युक्रेनमध्ये पॉर्न सामग्रीची निर्मिती, प्रसार किंवा विक्री पूर्णपणे प्रतिबंधित आहे आणि असे केल्यास ७ वर्षांपर्यंत तुरुंगवासाची शिक्षा आहे.
“३०,००० FPV ड्रोन खरेदीइतका कर मिळेल”
युक्रेनच्या संसदेच्या वित्त समितीचे अध्यक्ष आणि खासदार यारोस्लाव झेलेझनियाक हे विधेयक तयार करत आहेत. झेलेझनियाक यांच्या मते, या उद्योगाला औपचारिक अर्थव्यवस्थेत आणल्याने दरवर्षी किमान २.५ कोटी डॉलर (सुमारे ₹२१० कोटी) कर महसूल मिळेल. संसद सदस्याने सांगितले की, या कर संकलनाचा थेट वापर युक्रेनियन सैन्यासाठी सुमारे ३०,००० फर्स्ट पर्सन व्यू (FPV) स्ट्राइक ड्रोन खरेदी करण्यासाठी केला जाईल, जे रशियन सैन्याविरुद्ध फ्रंटलाइनवर खूप प्रभावी ठरत आहेत.
कर दिला तरी तुरुंग, न दिला तरी तुरुंग
युक्रेनमध्ये अॅडल्ट कंटेंट क्रिएटर्स, विशेषतः ‘OnlyFans’ मॉडेल्सची संख्या गेल्या काही वर्षांत मोठ्या प्रमाणात वाढली आहे. पण सध्याच्या कायद्यामुळे एक विचित्र परिस्थिती निर्माण झाली होती. आकडेवारीनुसार, २०२३ मध्ये सुमारे ७,९०० युक्रेनियन नागरिकांनी OnlyFans प्लॅटफॉर्मवरून १३.१ कोटी डॉलरपेक्षा जास्त कमाई केली. जेव्हा या महिला आणि मॉडेल्सनी कर विभागाकडे आपली कमाई जाहीर केली, तेव्हा पोलिसांनी त्यांच्या घरांवर छापे टाकले आणि अवैध पॉर्नोग्राफी तयार केल्याच्या आरोपाखाली खटले दाखल केले. झेलेझनियाक यांनी या परिस्थितीला ‘हास्यास्पद आणि दुःखद’ म्हणत सांगितले, “या महिला एकतर कर न देता गुन्हेगारी आरोपांना सामोरे जातात, किंवा कर देऊन पॉर्नोग्राफी कायदा मोडल्याच्या आरोपी ठरतात.”
राष्ट्रपती झेलेन्स्की यांच्या वेबसाइटवर याचिका आणि २५,००० सही
एक पीडित OnlyFans मॉडेल स्वेतलाना द्वोर्निकोव्हा यांनी पोलिस रेड आणि २०,००० डॉलर जप्त झाल्यानंतर राष्ट्रपती व्होलोडिमिर झेलेन्स्की यांच्या अधिकृत वेबसाइटवर एक याचिका दाखल केली. स्वेतलानाने याचिकेत युक्तिवाद केला की त्यांनी कर म्हणून सुमारे ९ लाख डॉलर भरले आहेत, जे “मोरच्यावर मारल्या गेलेल्या शेकडो सैनिकांइतके” योगदान आहे. याचिकेला फक्त एका आठवड्यात २५,००० पेक्षा जास्त लोकांचा पाठिंबा मिळाला, त्यानंतर राष्ट्रपती झेलेन्स्की यांनी संसदला कायद्यात दुरुस्ती करण्याचे निर्देश दिले. जुलैमध्ये विधेयकाने संसदेत पहिले वाचन पार केले आहे आणि आता ते अंतिम मंजुरीच्या जवळ आहे.
स्वदेशी शस्त्रांवर युक्रेनचा वाढता विश्वास
परदेशी लष्करी मदतीतील अनिश्चितता आणि विलंबाच्या पार्श्वभूमीवर युक्रेन आपली देशांतर्गत संरक्षण प्रणाली मजबूत करण्यासाठी निधी उभारण्याचे सर्व संभाव्य मार्ग शोधत आहे. युक्रेन आता लांब पल्ल्याचे हल्लेखोर ड्रोन, क्षेपणास्त्र-ड्रोन हायब्रिड आणि ग्राउंड रोबॉट्सचे उत्पादन करत आहे. अशा परिस्थितीत अॅडल्ट उद्योगातून मिळणारा कर देशाच्या सुरक्षेला आणि ड्रोन निर्माण क्षमतेला थेट गती देईल.
