25, 18 की 10 % भारतावर नेमका टॅरिफ किती? ट्रम्प यांच्या आदेशानंतर गोंधळ वाढला; जाणून घ्या!
अमेरिकेचे राष्ट्राध्यक्ष डोनाल्ड ट्रम्प यांनी आता नवा टॅरिफ लागू केला आहे. या निर्णयानुसार 10 टक्के टॅरिफ अनेक देशांकडून आकारला जाणार आहे.
New Tariffs : अमेरिकेतील सर्वोच्च न्यायालयाच्या टॅरिफ संदर्भआतील निर्णयानंतर आता जगभरात सर्वत्र अस्थिरता निर्माण झाली आहे. तेथील सर्वोच्च न्यायालयाने अमेरिकेचे राष्ट्राध्यक्ष डोनाल्ड ट्रम्प यांनी लागू केलेला जवळपास 100 देशांवरील टॅरिफ हा बेकायदेशीर आहे, असा निर्णय दिला आहे. तसेच ट्रम्प यांनी आपल्या अधिकारकक्षेच्या बाहेर जाऊन हा टॅरिफ लादलेला आहे, असेही तेथील न्यायालयाने स्पष्ट केले आहे. सर्वोच्च न्यायालयाचा हा निर्णय म्हणजे डोनाल्ड ट्रम्प यांच्यासाठी जबर धक्का असल्याचे बोलले जात आहे. याच निर्णयानंतर ट्रम्प यांनी लवकरच नवा 10 टक्के कर लागू करण्याचा निर्णय घेतला आहे. या निर्णयामुळेही गोंधळात जास्तच भर पडली आहे. भारतावर आता नेमका टॅरिफ किती आहे? असे विचारले जात आहे. या प्रश्नाचे नेमके उत्तर जाणून घेऊ या…
नेमका निर्णय काय घेण्यात आला?
अमेरिकन सर्वोच्च न्यायालयाच्या या निर्णयाचा एका प्रकारे भारताला फायदाच झाला आहे. कारण या निर्णयानंतर डोनाल्ड ट्रम्प यांच्या सरकारे सर्वे देशांवरील टॅरिफ 10 टक्के केला आहे. हा घेण्यात आलेला निर्णय तात्पुरता असला तरी यामुळे भारताला फायदा होणार आहे. अगोदर भारतावर अमेरिकेने 50 टक्के टॅरिफ लागू केला होता. भारत-अमेरिकेचा व्यापार करार झाल्यानंतर हा कर 18 टक्क्यांपर्यंत कमी करण्यात आला. आता अमेरिकेच्या या नव्या आदेशानंतर भारतावरील टॅरिफ 18 टक्क्यांवरून थेट 10 टक्क्यांपर्यंत खाली आला आहे.
सरसकट 10 टक्के टॅरिफ लागू असेल
व्हाईट हाऊसने दिलेल्या माहितीनुसार ज्या देशांनी अमेरिकेसोबत टॅरिफबाबत करार केले होते, त्या सर्व देशांवर सरसकट 10 टक्के टॅरिफ लागू असेल. यात भारताचाही समावेश आहे. जोपर्यंत आगामी निर्णय घेतला जात नाही किंवा अन्य कायदेशीर अधिकाराचा वापर होत नाही, तोपर्यंत हा टॅरिफ 10 टक्केच असेल.
भविष्यात नेमकं काय होणार?
दरम्यान, सर्वोच्च न्यायालयाच्या टॅरिफबाबतच्या निर्णयानंतर भारत-अमेरिका यांच्यातील अंतरिम व्यापार कराराचे काय होणार? असे विचारले जात होते. परंतु आता या व्यापार करारावर कोणताही परिणाम होणार नाही, असे खुद्द डोनाल्ड ट्रम्प यांनी सांगितले आहे. सोबतच भारत अमेरिकेला टॅरिफ देईल, पण अमेरिका भारताला टॅरिफ देणार नाही, असेही ते म्हणाले आहेत. त्यामुळे आता भविष्यात काय-काय घडामोडी घडणार हे पाहणे महत्त्वाचे ठरणार आहे.
