एक असं मंदिर जिथे दिवाळीनंतर प्रसाद म्हणून वाटले जातात पैसे, 300 वर्षांपासून सुरु आहे परंपरा
दिवाळीनंतर या मंदिरात भक्तांना प्रसाद म्हणून वाटले जातात पैसे. गेल्या 300 वर्षांपासून सुरु आहे ही अनोखी परंपरा. दर्शनासाठी भाविकांची असते प्रचंड गर्दी. कुठे आहे हे मंदिर?
दिवाळी हा हिंदू धर्मातील सर्वात महत्त्वाच्या सणांपैकी एक आहे. या दिवशी घरोघरी देवी लक्ष्मीची पूजा करून सुख, समृद्धी आणि भरभराटीची प्रार्थना केली जाते. मात्र, मध्य प्रदेशातील एका मंदिरात दिवाळीनंतरही एक अनोखी परंपरा पाहायला मिळते. या मंदिरात देवी लक्ष्मीच्या दर्शनानंतर भाविकांना प्रसाद म्हणून पैसे वाटले जातात. विशेष म्हणजे, ही परंपरा जवळपास 300 वर्षांपासून सुरू असल्याचे सांगितले जाते.
मध्य प्रदेशातील रतलाम शहरातील माणक चौक परिसरात श्री महालक्ष्मी मंदिर आहे. दिवाळी आणि भाऊबीजेच्या निमित्ताने या मंदिराला आकर्षक सजावट केली जाते. विशेष म्हणजे, मंदिरातील देवी लक्ष्मीला नोटा, सोन्या-चांदीचे दागिने आणि नाण्यांनी सजवले जाते.
दिवाळीच्या दिवशी भाविक मोठ्या श्रद्धेने देवीच्या चरणी पैसे, सोन्या-चांदीचे दागिने आणि नाणी अर्पण करतात. त्यानंतर भाऊबीजेच्या दिवशी मंदिरात भाविकांची मोठी गर्दी होते. या दिवशी भक्तांना प्रसाद म्हणून पैसे परत दिले जातात.
तिजोरीत पैसे ठेवल्याने भरभराट होते अशी श्रद्धा
मंदिरातील परंपरेनुसार, दिवाळीत देवीला अर्पण केलेले पैसे भाऊबीजेच्या दिवशी प्रसाद म्हणून भाविकांना परत दिले जातात. देवीकडून मिळालेला हा पैसा घरातील तिजोरीत किंवा पैशांच्या कपाटात ठेवल्यास वर्षभर घरात धन-धान्याची कमतरता भासत नाही आणि आर्थिक भरभराट होते, अशी भाविकांची श्रद्धा आहे. त्यामुळे हा प्रसाद मिळवण्यासाठी दूरदूरवरून भाविक मंदिरात येतात.
काय आहे या 300 वर्षांच्या परंपरेमागील इतिहास?
असे सांगितले जाते की, या मंदिराची परंपरा रियासत काळापासून सुरू आहे. रतलाम शहराचे संस्थापक महाराजा रतन सिंह राठोड दिवाळी आणि धनत्रयोदशीच्या दिवशी देवीच्या शृंगारासाठी राजखजिन्यातून सोन्या-चांदीचे दागिने आणि मौल्यवान वस्तू अर्पण करत असत. पुढे ही परंपरा कायम राहिली. देवीला अर्पण केलेली संपत्ती भाविकांमध्ये प्रसाद म्हणून वाटण्याची प्रथा सुरू झाली आणि आजही ती श्रद्धेने पाळली जाते.
महालक्ष्मी मंदिरात कसे पोहोचाल?
हे मंदिर मध्य प्रदेशातील रतलाम शहरातील माणक चौक परिसरात आहे. रेल्वेने जायचे असल्यास रतलाम जंक्शन हे सर्वात जवळचे रेल्वे स्थानक आहे. तेथून ऑटो किंवा टॅक्सीने मंदिरात पोहोचता येते.
विमानाने जाणाऱ्या भाविकांसाठी इंदूर येथील देवी अहिल्याबाई होळकर विमानतळ हा जवळचा पर्याय आहे. विमानतळापासून रतलामचे अंतर सुमारे 130 किलोमीटर आहे. इंदूर, उज्जैन आणि भोपाळ येथून बसनेही रतलामला जाता येते.
