अनिल केऱ्हाळे, TV9 मराठी, जळगाव : जळगाव शहरात सकल मराठा समाजाच्या वतीने जिल्हाधिकारी कार्यालयावर मोर्चा नेण्यात येणार आहे. स्थानिक गुन्हे शाखेचा पोलीस निरीक्षक किरणकुमार बकाले याला अटक करा, त्याला पोलीस दलातून निलंबित नव्हे, तर बडतर्फ करा, अशी मागणी सकल मराठा समाजाने केली होती. पण पंधरावाडा उलटूनही किरणकुमार बकालेला अटक करण्यात पोलिसांना अपयश आलं आहे.अखेर मागणीनंतर पोलिसांकडून हालचाल दिसत नसल्याने, जळगाव शहरात सकल मराठा समाजाच्या वतीने जिल्हाधिकारी कार्यालयावर मोर्चा काढण्यात येणार आहे, हा मोर्चा शनिवारी ३० सप्टेंबर रोजी निघणार आहे. या मोर्चात ५० हजार मराठा बांधव सहभागी होतील असा दावा मोर्चाच्या आयोजकांनी केला आहे.या मोर्चाला जिल्हातूनच नव्हे तर राज्यभरातून सकल मराठा समाजातील बांधव उपस्थित राहणार असल्याचं आयोजकांनी म्हटलं आहे.
सकल मराठा समाजाची मागणी पूर्ण न झाल्याने, सकल मराठा समाज ५० हजार लोकांचा मोर्चा काढणार आहे, खरंतर पोलीस दलातील वरिष्ठ अधिकाऱ्यांनी हा मोर्चा निघू नये म्हणून प्रयत्न करायला हवा होता. यासाठी कथित ऑडिओ क्लिप प्रकरणी किरणकुमार बकाले यांना अटक करुन हा मोर्चा टाळता आला असता.
दुसरीकडे तपासाचा अहवाल अजून आलेला नाही, हा तपास कोण करणार आहे, हे देखील स्पष्ट झालेलं नाही. या बाबतीत नाशिकचे आयजी बी जी शेखर यांनी जे पत्र काढलं होतं, त्यातील एकही पुर्तता न झाल्याने सकल मराठा समाजात संताप आहे.
किरणकुमार बकाले हा स्थानिक गुन्हे शाखेचा पोलीस निरीक्षकपदी होते. मात्र त्यांच्या निलंबनानंतर त्याची टीम बरखास्त करणे देखील गरजेची होतं, यानंतर नवी टीम स्थापन करावी लागते, पण असा कोणताही निर्णय घेतला गेला नाही. किरणकुमार बकालेच्या टीमचेच सदस्य किरणकुमारला अटक करायला कसे धजावतील हा प्रश्न होता. यामुळे किरणकुमार बकाले अजूनही मोकाट असल्याची चर्चा पोलीस दलात दबक्या आवाजाने आहे.
किरणकुमार बकाले यांच्या जागी प्रभारी म्हणून स्थानिक गुन्हे शाखेला एका पोलीस अधिकाऱ्याची नियुक्ती करण्यात आली होती, पण जळगाव पोलीस अधिक्षक प्रवीण मुंढे यांच्या या आदेशाला स्थगिती देण्यात आली आहे. यावरुन डॉ.प्रवीण मुंढे यांना निर्णय स्वांतत्र्य नाही का असा देखील सवाल विचारला जात आहे.
किरणकुमार बकाले हा सतत बाहेरुन जामीन मिळवण्यासाठी प्रयत्न करतोय, दिवसामागून दिवस जात असल्याने पुरावे संपवणे, नष्ट करणे, संबंधित पुराव्यात मतं बदलवणे यात त्याला वेळ मिळत असल्याचं म्हटलं जात आहे. पोलीस दलातील कोणता मोठा अधिकारी किरणकुमार बकालेला मदत करतोय, यावर देखील जळगाव शहरात चर्चा सुरु आहे.