Sanjay Raut :आधी स्वतःचा विभाग स्वच्छ करा…; संजय राऊतांचं तुकाराम मुंढेंना पत्र, FDAतील कथित गैरकारभारावर थेट सवाल

शिवसेना (उद्धव बाळासाहेब ठाकरे) नेते संजय राऊत यांनी प्रशासकीय अधिकारी तुकाराम मुंढे यांना पत्र लिहून अन्न व औषध प्रशासन (FDA) विभागातील कथित गैरकारभारावर आवाज उठवला आहे. आधी स्वतःचा विभाग स्वच्छ करा असा सल्ला देत राऊत यांनी मुंढेंना एफडीएमध्ये सुधारणा करण्याचे आवाहन केले आहे. या पत्रातून राऊत यांनी एफडीएमधील अधिकाऱ्यांकडून मोठ्या प्रमाणावर लूट सुरू असल्याची गंभीर माहिती मुंढेंच्या निदर्शनास आणून दिली आहे.

राऊत यांनी आपल्या पत्रात म्हटले आहे की, तुकाराम मुंढे यांचा इफेक्ट एफडीएच्या कार्यालयातही दिसणे अत्यंत गरजेचे आहे. एफडीएमधील अधिकारी भ्रष्टाचारात लिप्त असल्याचा आणि सामान्य जनतेची लूट करत असल्याचा आरोप राऊत यांनी केला आहे. या गंभीर आरोपांची तात्काळ चौकशी करून दोषींवर कठोर कारवाई करावी, अशी अपेक्षा राऊत यांनी व्यक्त केली आहे.

विशेष म्हणजे, यापूर्वी संजय राऊत यांनी तुकाराम मुंढे यांच्या प्रशासकीय कामाचे कौतुक केले होते. मात्र, आता त्यांनी एफडीए विभागातील कथित भ्रष्टाचाराकडे त्यांचे लक्ष वेधत, विभागाला स्वच्छ करण्याची मागणी केली आहे. राज्याच्या राजकारणात आणि प्रशासनात या पत्राची जोरदार चर्चा सुरू आहे.