Gen Z मध्ये वाढतोय सेल्फ गिफ्टिंगचा ट्रेंड, जाणून घ्या याचे फायदे

Self Gifting Trend: तरुणांमध्ये आता इतरांना भेटवस्तू देण्याऐवजी सेल्फ गिफ्टींग म्हणजे स्वतःलाच गिफ्ट देण्याचा ट्रेंड वाढत आहे. यासंदर्भात एक सर्वेक्षण करण्यात आले असून, त्यामध्ये तरुण इतरांसाठी कोणत्या पद्धतीने आणि कशा प्रकारे भेटवस्तू खरेदी करतात, याचाही आढावा घेण्यात आला आहे.

Gen Z मध्ये वाढतोय सेल्फ गिफ्टिंगचा ट्रेंड, जाणून घ्या याचे फायदे
सेल्फ गिफ्टिंगचा ट्रेंड
Image Credit source: Instagram
| Edited By: | Updated on: Nov 18, 2026 | 3:44 PM

सणासुदीच्या काळात किंवा एखाद्या खास प्रसंगी आपल्या जवळच्या व्यक्तींना भेटवस्तू देण्याची परंपरा अनेक वर्षांपासून सुरू आहे. मात्र, आता Gen Z म्हणजेच तरुण पिढीमध्ये भेटवस्तू देण्याच्या पद्धतीत बदल होताना दिसत आहे. इतरांना गिफ्ट देण्यासोबतच तरुण स्वतःसाठीही आवर्जून भेटवस्तू खरेदी करत आहेत. स्वतःवर प्रेम व्यक्त करण्याचा हा एक मार्ग मानला जात आहे. एका सर्वेक्षणातून तरुणांच्या गिफ्ट देण्याच्या सवयींमधील हे बदल समोर आले आहेत. जाणून घेऊया सेल्फ गिफ्टिंगचा वाढता ट्रेंड आणि त्याचे फायदे.

सेल्फ गिफ्टिंगचा ट्रेंड वाढला

यूगव-रुकम कॅपिटलच्या २०२६ मधील सर्वेक्षणानुसार, तरुणांमध्ये स्वतःलाच गिफ्ट देण्याचा ट्रेंड वाढत आहे. सर्वेक्षणात सहभागी झालेल्या ३० टक्के तरुणांनी सणासुदीच्या काळात इतरांना भेटवस्तू देण्याऐवजी आधी स्वतःसाठी गिफ्ट खरेदी करण्याला प्राधान्य दिले. यामध्ये कॉन्सर्टची तिकिटे, स्पा, जिम व्हाउचर आणि महागड्या बॅग्स यांसारख्या वस्तूंचा समावेश आहे. तसेच, २५ टक्के तरुण गिफ्टसाठी कल्पना शोधताना एआयची मदत घेत असल्याचेही समोर आले आहे. भारतात सेल्फ गिफ्टिंगचे प्रमाण जवळपास ६० टक्क्यांपर्यंत वाढले असून, त्यातील ऑनलाइन विक्रीचा वाटा सुमारे २५ टक्के आहे.

Loading...

स्वतःला गिफ्ट देण्याचे फायदे

दुसऱ्यांकडून भेटवस्तू मिळाल्यावर आनंद होतोच, पण स्वतःलाच एखादी भेट दिल्यानेही चांगले वाटू शकते. सेल्फ गिफ्टिंग हा स्वतःवर प्रेम व्यक्त करण्याचा एक मार्ग आहे. उदाहरणार्थ, दिवसभराच्या कामानंतर आराम करण्यासाठी स्पाची अपॉइंटमेंट घेणे किंवा एखाद्या खास प्रसंगानिमित्त स्वतःला भेटवस्तू देणे, यामुळे मन प्रसन्न होते. एखादे कठीण काम पूर्ण केल्यानंतर स्वतःला बक्षीस दिल्याने मूड सुधारण्यासोबतच आत्मविश्वास वाढण्यास आणि पुढील कामासाठी प्रेरणा मिळण्यास मदत होऊ शकते.

मित्रांसाठी भेटवस्तू निवडण्याची पद्धत बदलली

Gen Z मधील तरुण मित्रांसाठी भेटवस्तू खरेदी करतानाही त्यांच्या आवडीनिवडींचा विचार करतात. केवळ दिसायला सुंदर असलेली वस्तू देण्याऐवजी वैयक्तिक आवड लक्षात घेऊन भेटवस्तू निवडण्याकडे त्यांचा कल आहे. भेटवस्तू उपयोगी पडावी किंवा त्यातून एखादी सुंदर आठवण तयार व्हावी, याला तरुण अधिक महत्त्व देत आहेत.

इकोफ्रेंडली गिफ्टचा ट्रेंड

तरुणांमध्ये पर्यावरणपूरक भेटवस्तू देण्याचाही ट्रेंड वाढत आहे. यामधून पर्यावरणाबाबतची त्यांची जागरूकता दिसून येते. मित्रांच्या नावाने झाडे लावणे किंवा त्यांना रोपे भेट देणे अशा गोष्टी केल्या जात आहेत. याशिवाय जुन्या गिफ्ट बॉक्ससारख्या वस्तूंचा पुन्हा वापर करण्यावरही भर दिला जात आहे. यासाठी काही संस्थाही काम करत आहेत.

पाळीव प्राण्यांनाही दिल्या जात आहेत भेटवस्तू

आता भेटवस्तू देण्याची पद्धत केवळ नातेवाईक आणि मित्रांपुरती मर्यादित राहिलेली नाही. तरुण आपल्या पाळीव प्राण्यांसाठीही आवडीने भेटवस्तू खरेदी करत आहेत. एका ऑनलाइन प्लॅटफॉर्मनुसार, २०२६ मध्ये पाळीव प्राण्यांसाठी भेटवस्तू खरेदी करण्यासंदर्भातील सर्च दुप्पट झाले आहेत. त्यामुळे Gen Z मध्ये भेटवस्तू देण्याच्या पद्धतीत सकारात्मक बदल होत असल्याचे दिसून येत आहे.

Loading...
Unable to load recommendations.
Follow Us