Sonia Gandhi : मी काँग्रेसचा समर्थक नसलो तरी…सोनिया गांधी यांच्या पुस्तकाबद्दल काय म्हणाले जावेद अख्तर?
Javed Akhtar On Sonia Gandhi : जावेद अख्तर यांनी सोनिया गांधी यांच्या पुस्तकाचं कौतुक केलं असून हे पुस्तक खूप रंजक वाटतंय, असं ते म्हणाले.

प्रसिद्ध गीतकार आणि पटकथालेखक जावेद अख्तर आपल्या स्पष्टवक्तेपणासाठी ओळखले जातात. सामाजिक आणि राजकीय विषयांवर ते अनेकदा आपली मतं मांडताना दिसतात. नुकत्याच एका कार्यक्रमात त्यांनी काँग्रेसच्या ज्येष्ठ नेत्या सोनिया गांधी यांच्या पुस्तकाबद्दल भाष्य केलं. सोनिया गांधी यांचं ‘बिलॉन्गिंग : अ जर्नी ऑफ लव्ह’ हे पुस्तक आपण वाचायला सुरुवात केली असून, त्याची लेखनशैली आपल्याला आवडल्याचं त्यांनी सांगितलं.
काय म्हणाले जावेद अख्तर?
जावेद अख्तर यांनी वृत्तसंस्था एएनआयशी संवाद साधताना सोनिया गांधी यांच्या पुस्तकाचं कौतुक केलं. ते म्हणाले, ‘मी नुकतंच सोनिया गांधी यांचं पुस्तक वाचायला सुरुवात केली आहे. मला ते खूपच रंजक वाटत आहे. हे पुस्तक वाचताना मजा येत आहे. त्याची लेखनशैली अतिशय सोपी आणि सहज समजणारी आहे. त्यामुळे पुस्तक वाचणं सोपं जात आहे. मात्र, संपूर्ण पुस्तक वाचून झाल्यानंतरच मी त्याबद्दल सविस्तर काही सांगू शकेन.’
यावेळी त्यांनी सोनिया गांधी यांच्याबद्दलचा आदरही व्यक्त केला. ‘मला एक गोष्ट कॅमेऱ्यासमोर स्पष्टपणे सांगायची आहे, ती म्हणजे माझ्या मनात सोनिया गांधी यांच्याबद्दल खूप आदर आहे. मी काँग्रेस पक्षाशी संबंधित नाही किंवा काँग्रेसचा समर्थकही नाही. पण तरीही सोनिया गांधी यांच्याबद्दल माझ्या मनात प्रचंड आदर आहे. कारण मी त्यांना वैयक्तिकरित्या ओळखतो. त्यांच्या व्यक्तिमत्त्वाचा माझ्यावर खूप प्रभाव पडला आहे,’ असं ते म्हणाले.
दरम्यान, सोनिया गांधी यांचं ‘बिलॉन्गिंग : अ जर्नी ऑफ लव्ह’ हे पुस्तक 10 नोव्हेंबर रोजी प्रकाशित झालं. त्यानंतर 16 नोव्हेंबर रोजी नवी दिल्ली येथे एका विशेष कार्यक्रमात या पुस्तकाचं अधिकृत प्रकाशन करण्यात आलं. या कार्यक्रमाला सोनिया गांधी यांचे पुत्र राहुल गांधी आणि कन्या प्रियंका गांधी वाड्रा यांचीही उपस्थिती होती. या पुस्तक प्रकाशन सोहळ्याला काँग्रेस अध्यक्ष मल्लिकार्जुन खरगे, समाजवादी पक्षाचे प्रमुख अखिलेश यादव, तमिळनाडूचे मुख्यमंत्री सी. जोसेफ विजय, झारखंडचे मुख्यमंत्री हेमंत सोरेन, कर्नाटकचे मुख्यमंत्री डी. के. शिवकुमार यांच्यासह अनेक राजकीय नेते उपस्थित होते.
