सीताफळ गोड अन् पिकलेलं आहे की नाही? खरेदीपूर्वी ‘या’ 3 ट्रिक्सने ओळखा
Custard Apple Buying Tricks: बाजारातून सीताफळ खरेदी करताना ते गोड आणि पिकलेलं आहे की नाही, हे ओळखणं अनेकदा कठीण जातं. मात्र, काही सोप्या ट्रिक्सच्या मदतीने तुम्ही चांगलं सीताफळ निवडू शकता. जाणून घ्या खरेदी करताना कोणत्या ३ गोष्टी तपासल्या पाहिजे.
सध्या बाजारात सीताफळ मोठ्या प्रमाणात पाहायला मिळत आहे. गोड चव आणि पौष्टिक गुणधर्मांमुळे अनेकांना सीताफळ खायला आवडते. सीताफळामध्ये व्हिटॅमिन सी, व्हिटॅमिन बी६, पोटॅशियम, मॅग्नेशियम आणि फायबरसारखे अनेक पोषक घटक असतात. यातील फायबरमुळे पचनक्रिया सुरळीत राहण्यास, तर व्हिटॅमिन सीमुळे रोगप्रतिकार शक्तीच्या सामान्य कार्यास मदत होते. तसेच सीताफळातील पोटॅशियम रक्तदाब नियंत्रित ठेवण्यासाठी उपयुक्त ठरू शकते. मात्र, बाजारातून सीताफळ खरेदी केल्यानंतर अनेकदा ते आतून कच्चे किंवा बेचव निघते. त्यामुळे पैसे खर्च करूनही गोड सीताफळ खाण्याचा आनंद मिळत नाही. अशा वेळी खरेदी करताना काही गोष्टींकडे लक्ष दिल्यास गोड आणि पिकलेले सीताफळ निवडणे सोपे होऊ शकते. जाणून घेऊया सीताफळ खरेदी करताना कोणत्या ३ ट्रिक्स उपयोगी पडू शकतात.
सीताफळाचा रंग तपासा
सीताफळ खरेदी करताना सर्वप्रथम त्याच्या रंगाकडे लक्ष द्या. सामान्यतः पिकलेल्या सीताफळाचा रंग फिकट हिरवा असतो. मात्र, सीताफळाच्या जातीनुसार त्याच्या रंगात थोडाफार फरक असू शकतो. जर सीताफळ गडद हिरव्या रंगाचे आणि खूप कडक असेल, तर ते कच्चे असण्याची शक्यता असते. त्यामुळे केवळ रंग पाहून फळ निवडू नका. त्याचा पोत आणि मऊपणाही तपासा.
सीताफळाची साल आणि सुगंध पाहा
सीताफळाच्या बाहेरील सालीवर असलेल्या खाचा आणि उंचवट्यांवरूनही ते किती पिकले आहे, याचा अंदाज येऊ शकतो. पिकलेल्या सीताफळाच्या सालीवरील उंचवटे एकमेकांपासून थोडे दूर झालेले दिसतात. तसेच सालीवर हलक्या भेगा किंवा खाचा दिसू शकतात. याशिवाय पिकलेल्या सीताफळाला नैसर्गिक गोडसर सुगंध येतो. तर कच्च्या सीताफळाला विशेष सुगंध येत नाही. त्यामुळे खरेदी करताना फळाचा वास घेऊनही ते पिकलेले आहे की नाही याचा अंदाज घेता येतो.
सीताफळ हलके दाबून पाहा
सीताफळ पिकले आहे की नाही, हे ओळखण्यासाठी ते हातात घेऊन हलके दाबून पाहा. जर फळ थोडे मऊ लागले आणि हलक्या दाबाने दबले, तर ते पिकलेले असण्याची शक्यता जास्त असते. मात्र, सीताफळ खूप कडक असेल, तर ते अजून कच्चे असू शकते. तसेच फळ अतिशय मऊ किंवा खराब झालेले नाही ना, याचीही खात्री करा. त्यामुळे सीताफळ खरेदी करताना ही सोपी ट्रिक नक्की वापरून पाहा.
