छट पूजेच्या वादात आदित्य ठाकरेंची उडी; म्हणाले, महाराष्ट्र अन् मुंबईत…
छट पूजेच्या वादात आदित्य ठाकरेंची उडी घेतली आहे. छट पूजेचा वाद हा भाजप पुरस्कृत आहे, अशी टीका आमदार आदित्य ठाकरे यांनी केली.
मुंबईत छट पूजेवरून राजकारण तापलं आहे. छट पूजेनिमित्त रेल्वे स्टेशनवरही गाणे वाजवण्यात आले. रेल्वेच्या निर्णयाचा मनसेने जोरदार विरोध केला. राज ठाकरे यांनी छट पूजेच्या वादावरून भाजपवर जोरदार टीका केली. मनसेनंतर आता ठाकरे गटानेही या वादात उडी घेतली आहे. आदित्य ठाकरे यांनी छट पूजेच्या वादावरून सत्ताधारी भाजपवर जोरदार टीका केली आहे. छट पूजेचा वाद हा भाजप पुरस्कृत असल्याची टीका केली.
छट पूजेवरून आदित्य ठाकरे म्हणाले,’छट पूजेचा वाद कुठेही नाहीत, त्यांना फक्त वाद वाढवायचे आहेत. तेच फक्त या गोष्टी करत आहेत. त्याला मुंबईत अस्थिरता हवी आहे. संजय राऊत यांनी सुद्धा यावर भाष्य केलंय. राज ठाकरे सुद्धा यावर बोलले आहेत. महाराष्ट्रात आणि मुंबई एक समाज आणि दुसरा समाज असा वाद निर्माण करण्याचा प्रयत्न होतोय. छट पूजेचा वाद हा भाजप स्पॉन्सर्ड आहे. आपल्याला उकसवून आपल्याला राग आणून खरे विषय महागाई असेल, हे सगळे विषय भ्रष्टाचाराचा विषय असेल, या सगळ्या विषयांवरून लक्ष विचलित करायचं, भाजपचा प्रयत्न आहे’. राहुल गांधींच्या फोन टॅपिंगच्या आरोपावरही आदित्य ठाकरेंनी भाष्य केलं. गांधींनी म्हटलं की, ‘तुमचाही फोन टॅपिंग होत असेल, हे 100 टक्के लिहून घ्या. एका बाजूला राजकीय फोर्सचा वापर विरोधकांवर केला जातोय. ही जी यंत्रणा आहे, ती देशविरोधी कारवाई करणाऱ्या वर वापरली तर देशाचे भलं होईल’.
राष्ट्रवादीच्या विलीनीकरणवर आदित्य ठाकरे म्हणाले, ‘आम्ही सुद्धा या बातम्या ऐकल्या आहेत. याबाबत आम्हालाही माहीत नाही, आम्हाला शरद पवार साहेबांकडून कोणतीही अधिकृत सूचना आलेली नाही’. शिंदे गटावर टीका करताना आदित्य ठाकरे म्हणाले, ‘जे तिकडे गेले, तिथे महाराष्ट्राची ज्यांनी गद्दारी केली, त्याचं एकच कारण होतं, ते म्हणजे पैसा आणि सत्ता. भाजपने गळचेपी केल्यानंतर त्यांना कुठेतरी वाटतंय की आपण नाव गमवतोय. आता ते मार्ग शोधायचा प्रयत्न करतायेत. उद्धव साहेबांपर्यंत येण्याचा प्रयत्न करतायेत. मला राजकारणात जायचं नाही, पण या लोकांनी एका घाणेरड्या स्तरापर्यंत राजकारण नेऊन ठेवले, यावरून वाटतं.. महाराष्ट्र कुठे नेऊन ठेवलाय.पालकमंत्र्यांच्या घरावर दगडफेक होते, विद्यार्थी रस्त्यावर उतरलेत. दुष्काळामुळे शेतकरी त्रस्त आहेत. सध्या महाराष्ट्रात मोठा प्रश्न आहे, तो म्हणजे पाण्याचा, मराठवाड्यात पंधरा दिवसांनी एकदा पाणी येत आहे. ती परिस्थिती मुंबई सुद्धा होणार आहे. प्रदूषण वाढते आहे, केंद्रीय पर्यावरण मंत्री कुठे आहेत, असा सवाल यावेळी त्यांनी केला.
