lumpy disease : शेकडो जनावरे लम्पी आजाराच्या विळख्यात, वाशिम जिल्ह्यात पशुपालक चिंतेत
उत्तर प्रदेशात लम्पी या आजारानं 115 जनावरं दगावली. 17 लाख जनावरांचं लसीकरण करण्यात आलं. याचा धसका राज्यातील पशुसंवर्धन विभागानं घेतला.
वाशिम : जिल्ह्याच्या वाकद परिसरातील शेकडो जनावरांना लम्पी (lumpy) या संसर्गजन्य रोगाची मोठ्या प्रमाणात लागण झालीय. लम्पीनं एका बैलाचा मृत्यू झाला. त्यामुळं पशुपालकांमध्ये (animal husbandry) भीती पसरली आहे. लम्पी आजारावर प्रभावी उपाययोजना करण्याची मागणी पशुपालकांनी पशु संवर्धन विभागाकडे केली आहे.रिसोड तालुक्यातील वाकद परिसरातील शेकडो पाळीव जनावरे (animals) लम्पी रोगाच्या विळख्यात सापडली आहेत.या रोगामुळे श्रीराम देशमुख या शेतकऱ्याच्या एका बैलाचा मृत्यू झाला. पशुसंवर्धन विभागाने लम्पी रोगावर प्रभावी उपाययोजना करून पशुपालक शेतकऱ्यांना दिलासा देण्याची मागणी श्रीराम देशमुख यांनी केली आहे.
लम्पी संसर्गजन्य आजार
वाकद परिसरातील 24 जनावरे लम्पी या संसर्गजन्य रोगाच्या विळख्यात सापडलीत. यातील एका बैलाचा मृत्यू झाला आहे. लम्पी रोग संसर्गजन्य असल्याने पशुपालकांनी बाधित जनावराला वेगळे ठेवावे. गोठ्याची स्वच्छता,जनावरांची स्वच्छता ठेवावी. आवश्यक त्या फवारण्या कराव्यात असं आवाहन जिल्हा पशुसंवर्धन अधिकारी विनोद वानखेडे यांनी केलं. पशुसंवर्धन विभाग उपाययोजनांसाठी तत्पर आहे.त्यामुळं पशुपालकांनी घाबरून जाऊ नये असंही जिल्हा परिषदेच्या पशुसंवर्धन विभागाचे डॉ. विनोद वानखेडे यांनी म्हटंलय.
युपीत लम्पीने घेतला 115 जनावरांचा बळी
लम्पी या आजाराचा प्रभाव राज्यातील 13 जिल्ह्यात पाहायला मिळतो. जळगाव जिल्ह्यात सुरुवातील लागण झाली होती. इतर जिल्ह्यातही त्याचा प्रसार होतोय.लसीकरणाचे औषध उशिरा पोहचलं. त्यामुळं लम्पी आजार वाढण्याचा धोका निर्माण झालाय. राज्यातील पशुवैद्यक सतर्क झाले आहेत. राज्यात लसीकरण करण्यात येतंय. तरीही लम्पी आटोक्यात आणण्याचे आवाहन पशुसंवर्धन विभागासमोर आहे. उत्तर प्रदेशात लम्पी या आजारानं 115 जनावरं दगावली. 17 लाख जनावरांचं लसीकरण करण्यात आलं. याचा धसका राज्यातील पशुसंवर्धन विभागानं घेतला.
