महाराष्ट्र दुष्काळात… भाजप नेत्यावर नोटांची उधळण; जालन्यातच घडला धक्कादायक प्रकार
महाराष्ट्रात भीषण दुष्काळ असताना, जालन्यात भाजप नेते कैलास गोरंट्याल यांच्यावर भजन कार्यक्रमात नोटांची उधळण झाल्याने संताप व्यक्त होत आहे. शेतकरी पिके उद्ध्वस्त झाल्याने दुःखात असताना, ही घटना धक्कादायक आहे. गोरंट्याल यांनी कार्यकर्त्यांचा आग्रह आणि भक्तीत माणूस मंत्रमुग्ध होतो, असे स्पष्टीकरण दिले.
रामनाथ ढाकणे, टीव्ही9 मराठी प्रतिनिधी : महाराष्ट्रात दुष्काळ आहे. राज्य सरकारने राज्यातील 358 तालुक्यांपैकी 305 तालुक्यात दुष्काळ जाहीर केला आहे. दुष्काळ निवारणासाठी उपाययोजनाही जाहीर करण्यात आल्या आहेत. तर, दुसरीकडे डोळ्यासमोरच पावसाअभावी उभी पीकं जळून खाक झाल्याने शेतकरी हवालदिल झाला आहे. अनेक शेतकऱ्यांना पिकांवर रोटावेटर फिरवावा लागला आहे. डोळ्यात अश्रू आणि छातीत वेदना घेऊन शेतकरी दिवस ढकलत आहेत. मात्र, भाजपच्या नेत्यावर नोटांची उधळण झाल्याचा धक्कादायक प्रकार समोर आला आहे. ज्या जालन्यात मोठा दुष्काळ आहे, त्याच भागात हा प्रकार घडल्याने संताप व्यक्त केला जात आहे.
जालन्यात भजनाच्या कार्यक्रमात भाजप नेते कैलास गोरंट्याल यांच्यावर नोटांची उधळण करण्यात आली आहे. काल रात्री जालना शहरात मंमादेवी मंदिर परिसरात पार पडलेल्या भजन कार्यक्रमांमध्ये नोटांची उधळण करण्यात आली. भाजपचे माजी आमदार कैलास गोरंट्याल यांनी रात्री शहरातील मंमादेवीच्या भजन कार्यक्रमात कार्यकर्त्यांच्या आग्रहावरून ठेका धरला होता. गोरंट्याल यांनी मै हुँ डॉन… या गाण्यावर ठेका धरला होता. गोरंट्याल यांच्यावर पैशाची उधळण झाल्याची आणि त्यांनी ठेका धरल्याची बातमी येताच संतप्त प्रतिक्रिया उमटल्या आहेत. त्यामुळे गोरंट्याल यांनी सारवासारव केली आहे.
कार्यकर्त्यांच्या आग्रहास्तव…
भजन कार्यक्रमाच्या अगोदर मी देवाकडे शेतकऱ्यांसाठी प्रार्थना केली. भजनामध्ये माणूस मंत्रमुग्ध होतो. तेव्हा कोण काय करतो माहीत होत नाही, अशी सारवासारव कैलास गोरंट्याल यांनी केली आहे. आरतीच्या निमित्ताने मी कार्यक्रमाला गेलो असता कार्यकर्त्यांच्या आग्रहास्तव त्यांच्या म्हणण्या प्रमाणे करावं लागतं. प्रामाणिकपणाने सांगतो, दुष्काळग्रस्त शेतकऱ्यांसाठी आमचं सरकार आणि आम्ही कटिबद्ध आहोत. माझी कार्यकर्त्यांना सांभाळण्याची एक वेगळी पद्धत आहे. आपण पुढाऱ्यासारखं वागलं तर ते आपल्या सोबत येत नाहीत, म्हणून त्यांच्यासारखं वागावं लागतं, असंही त्यांनी म्हटलंय.
सरकारची मदत जाहीर
दरम्यान, राज्य सरकारने आज अजून 40 तालुक्यांमध्ये दुष्काळ जाहीर केला आहे. तसेच दिवाळीपूर्वी तातडीची मदत म्हणून शेतकऱ्यांना प्रत्येकी 5 हजार रुपये देण्यात येणार आहेत. शेतकऱ्यांच्या खात्यात हे पैसे जमा होतील. बाकीचे पैसे नंतर देण्यात येणार असल्याचं सरकारने जाहीर केलं. तसेच चारा आणि पाण्याची व्यवस्था करण्यात आली असल्याची माहिती मुख्यमंत्री देवेंद्र फडणवीस यांनी दिली आहे.
