Aurangabad | रनवेवर खोकड अन् विमान हवेतच गोल गोल, औरंगाबादेत लँडिंग करताना विचित्र खोडा

सांकेतिक छायाचित्र

औरंगाबादः एखादा लहानसा प्राणीही (Small Animal) अवघी यंत्रणा कशी वेठीस धरू शकतो, याचा दाखला गुरुवारी औरंगाबादेत मिळाला. औरंगाबाद येथील चिकलठाणा विमानतळाच्या (Aurangabad Air port) धावपट्टीवर एका खोकडाने संपूर्ण व्यवस्थापनाची भंबेरी उडवली. मुंबईहून औरंगाबादेत आलेलं विमान धावपट्टीवर उतरण्यासाठी सज्ज होतं. पण इकडे धावपट्टीवर (Runway) ठिय्या मारून बसलेले खोकड होते. एवढाचा प्राणी पण त्याला हुसकावून लागण्यासाठी अधिकाऱ्यांना बराच घाम गाळावा लागला. तोपर्यंत 66 प्रवाशांना घेऊन आलेले विमान आकाशातच गोल गोल फिरत बसले. अखेर या खोकडाला पळवून लावण्यात अधिकाऱ्यांना यश आले आणि प्रवाशांसह अधिकाऱ्यांचा जीव भांड्यात पडला.

कधी, कसा घडला प्रकार?

झालं असं की, गुरुवारी दुपारी 4.20 च्या सुमारास मुंबईहून 66 प्रवाशांना घेऊन एअर इंडियाचे विमान औरंगाबादेत आले. आकाशातून औरंगाबादमधून विमानतळावर उतरण्याची परवानगी मागण्यात आली. मात्र त्याला ट्राफिक कंट्रोल रुमने उतरण्यास परवानगी दिली नाही. कारण धावपट्टीवर एका खोकडाने ठिय्या मारला होता. ट्राफिक कंट्रोलने ही माहिती विमानतळ प्राधिकरणाला कळवली. ही माहिती मिळताच सायरन वाजवत प्राधिकरणाच्या गाड्यांनी रनवे गाठला. खोकडाला हुसकावण्यासाठी सुरक्षा रक्षक आणि अधिकारी सरसावले. त्यानंतर हे खोकड इकडे-तिकडे पळू लागले. तब्बल 10 ते 15 मिनिटे ही पळापळ झाली. त्यानंतर खोकडाला हुसकावून लागवण्यास अधिकाऱ्यांना यश आले. तोपर्यंत हे विमान हवेतच गोल गोल फिरत बसले.

खोकड गेल्यानंतर विमान धावपट्टीवर

खोकडाला हुसकावून लावल्यानंतर 66 प्रवाशांना घेऊन आलेले हे विमान सुरक्षितरितीने धावपट्टीवर उतरवण्यात आले. त्यानंतरच अधिकाऱ्यांनी निःश्वास सोडला. एक लहानसा प्राणीदेखील अवघी यंत्रणा कशी वेठीस धरू शकतो, हेच औरंगाबादमधील प्रसंगावरून दिसून आले.

खोकड प्राणी नेमका कसा?

खोकड हा कोल्ह्यासारखा दिसणारा मांसाहारी प्राणी आहे. तो मोकळ्या मैदानात राहतो. वाळवंटी प्रदेशालगतच्या वैराण आणि झुडुपं असलेल्या भागात राहतो. जमिनीत, कालव्यांच्या आशपास किंवा खडकाळ जमिनीत बिळं करून राहतो. खोकड हा निशाचर प्राणी असून दिवसा झोप घेतो आणि संध्याकाळी भक्ष्य शोधण्यासाठी बाहेर पडतो. अंधार दाटून आल्यावर तो ओरडतो. लहान सस्तन प्राणी, सरपटणारे प्राणी, खेकडे आणि कीटक तसेच कलिंगड, बोरे, हरभऱ्याचे घाटे हे त्याचे अन्न आहे.

इतर बातम्या-

एसटी महामंडळाचं विलीनिकरण शक्य नाही, राज्य सरकारचा अहवाल विधानसभेत

गोंदियातील सेजगावमध्ये महिला डॉक्टरने घेतला गळफास, किरायाच्या घरात का घेतला अंतिम श्वास?