Ashok Kharat: भिडे गुरुजी आपण या, आपण दोघेही मिळून खरातला संपवू , माजी मंत्र्यांच्या वक्तव्याने एकच खळबळ, प्लॅन काय?
Big Appeal to Bhide Guruji: अशोक खरात याच्याविरोधात समाजात संतापाची लाट आहे. तर त्याला साथ देणाऱ्या नेत्यांवरही मोठा रोष आहे. शिवप्रतिष्ठाण संघटनेचे प्रमुख मनोहरराव भिडे यांनी सुद्धा याप्रकरणी त्यांचा संताप व्यक्त केला. आता माजी मंत्र्यांने त्यांना सोबत येण्याची आणि खरातला संपवण्याची भाषा केल्याने एकच खळबळ उडाली आहे.
Subhod Savaji on Ashok Kharat: नाशिकचा भोंदूबाबा अशोक खरात याने अनेकांचे जीवन नासवले. 150 हून अधिक महिलांचे त्याने लैंगिक, आर्थिक शोषण केल्याचा आरोप करण्यात येत आहे. अनेक ठिकाणी जमिनी लाटल्या. भूखंड हडपले असा आरोप करण्यात येत आहे. खरातविरोधात महाराष्ट्रात संतापाची लाट आहे. विरोधी पक्षच नाही तर अनेक संघटनांनी त्याला कडक शिक्षा करण्याची मागणी केली आहे. तर शिवप्रतिष्ठाण संघटनेचे प्रमुख मनोहरराव भिडे यांनी सु्द्धा याप्रकरणात त्यांच्या संतापाला वाट मोकळी करून दिली आहे. तर याच प्रकरणात आता भिडे यांना एका माजी मंत्र्यांने मोठे आवाहन केले आहे. त्यांनी खरात याला संपवण्यासाठी भिडे गुरुजी यांना सोबत येण्याचे आवाहन केले आहे. त्यामुळे एकच खळबळ उडाली आहे.
भिडे गुरूजी आपण या, दोघेही मिळून खरातला संपवू
भिडे गुरुजी आपण या , मी आपणास सोबत येतो. आपण दोघेही मिळून खरातला संपवू असे वक्तव्य बुलढाण्यातील माजी मंत्री सुबोध सावजी यांनी केले आहे. भिडे गुरुजी यांच्या भोंदू अशोक खरातच्या वक्तव्याला माजी मंत्री सुबोध सावजी यांनी पाठिंबा दिला आहे. भोंदू बाबा अशोक खरातला मारून टाकून मोकळे व्हावं, या भिडे गुरुजी यांचा वक्तव्याला माजी मंत्री सुबोध सावजी यांनी पाठिंबा दिला आहे. सावजी म्हणतात की, भिडे गुरुजी आपणास विनंती करतो की , आपण या ,मी आपल्या सोबत येतो, आपण दोघेही मिळून खरातला संपवू . त्यांनी एकप्रकार भिडे गुरुजी यांचे वक्तव्याला पाठिंबा दिला आहे . त्यांच्या या वक्तव्यामुळे एकच खळबळ उडाली आहे.
एका लोकप्रतिनिधीने बँकेची जागा बदलली
भोंदू अशोक खरात याच्या सांगण्यावरून एका लोकप्रतिनिधीने बँकेची जागा बदलल्याचा दावा करण्यात येत आहे. अंधश्रद्धा निर्मूलन समितीचे कृष्णा चांदवड यांनी हा दावा केला आहे. नाशिक जिल्हा बँक नाशिकच्या द्वारका परिसरातून सीबीएस येथे स्थलांतरित केली. भोंदू अशोक खरात यांच्या सांगण्यावरूनच बँकेची जागा बदलण्याचा संशय व्यक्त केला. अंधश्रद्धा निर्मूलन समितीने याविषयीचे पत्र दिल्याची माहिती समोर येत आहे. चौकशीत सत्यता आल्यास लोकप्रतिनिधींचे नाव उघड करणार असल्याचा दावा करण्यात येत आहे. गेल्या दहा दिवसांपासून भोंदू अशोक खरात हा पोलीस कोठडीत आहे. त्याच्याकडून अजून बरीच माहिती समोर यायची आहे. त्याने आतापर्यंत काय काय कबुलीजबाब दिला याकडे राज्याचे लक्ष लागले आहे. त्याची पोलीस कोठडी उद्या संपत आहे.
