अखेर अमित शाहांनी शब्द दिला, एकनाथ शिंदेंनी भेट घेताच…दिल्लीच्या बैठकीत मिळालं मोठं आश्वासन!

Eknath Shinde Amit Shah Meeting : उपमुख्यमंत्री एकनाथ शिंदे यांनी मंगळवारी रात्री (15 जुलै) दिल्लीच्या दौऱ्यावर असताना केंद्रीय मंत्री अमित शाहा यांची भेट घेतली. शिवसेनेचे नेते तथा खासदार श्रीकांत शिंदे तसेच नुकतेच ठाकरे गटातून आलेले 6 खासदार त्यांच्यासोबत या बैठकीत हजर होते. अमित शाहा आणि शिंदे यांच्यात एकूण 45 मिनिटे बैठक झाली. या बैठकीत बंद दाराआड वेगवेगळ्या विषयांवर चर्चा झाल्याचे बोलले जात आहे. बैठकीत नेमकी कोणत्या विषयावर चर्चा झाली हे अद्याप समोर आलेले नाही. परंतु मिळालेल्या माहितीनुसार सहा खासदारांना अमित शाहा यांच्याकडून मोठे आश्वासन मिळाल्याचे बोलले जात आहे.

दिल्लीतील बैठकीत नेमकं काय घडलं?

लवकरच केंद्रात मंत्रिमंडळ विस्तार होणार आहे. या मंत्रिमंडळ विस्तारात खासदार श्रीकांत शिंदे यांना कॅबिनेट मंत्रिपद दिले जाण्याची शक्यता आहे. शिवसेनेच्या वाट्याला आणखी एक राज्यमंत्रिपदही मिळू शकते. या सर्व चर्चा सुरू असतानाच शिंदे यांनी दिल्लीत अमित शाह यांची भेट घेतली. याच बैठकीबाबत उपमुख्यमंत्री एकनाथ शिंदे यांनी काही माहिती दिली आहे. अमित शाह यांची आम्ही सदिच्छा भेट घेतली. त्यांचे आशीर्वाद घ्यायला आम्ही गेलो होतो. खासदारांच्या मतदारसंघातील विकासकामाचे विकास प्रस्ताव, पत्र आम्ही अमित शाह यांना दिले आहेत, असे शिंदे यांनी सांगितले. तसेच श्रीकांत शिंदे यांनी सर्व नव्या आणि जुन्या खासदारांशी समन्वय साधावा, असेही शाह यांनी सूचित केल्याचे शिंदे यांनी सांगितले आहे.

अमित शाह यांच्याकडून नेमका काय शब्द मिळाला?

दरम्यान, अमित शाह यांनीदेखील ठाकरे गटातून नुकतेच शिंदे गटात आलेल्या सहा खासदारांनी आपापल्या मतदारसंघाच्या विकासकामाबाबत काही मागण्या केल्याचे बोलले जात आहे. यावर कोणालाही निधी कमी पडू देणार नाही. निश्चिंत राहा असा शब्द अमित शाह यांनी सहा खासदारांना दिलेला आहे. त्यामुळे आता ठाकरे गटातून शिंदे गटात आलेल्या खासदारांच्या मतदारसंघात नेमके काय बदल दिसणार, हे पाहणे महत्त्वाचे ठरणार आहे.