शाळेत मुलांना घेऊन चालली होती स्कूल बस, अचानक बसचा स्टेअरिंग रॉड तुटला अन्…
नेहमीप्रमाणे विद्यार्थी स्कूल बसने सकाळी शाळेत जायला निघाले. शाळेपासून 5 किमी अंतरावर येताच बसला अपघात झाला. दैव बलवत्तर म्हणून मोठा अनर्थ टळला.
जळगाव / अनिल केऱ्हाळे : बसचे स्टेअरिंग रॉड तुटल्याने स्कूल बस अनियंत्रित होऊन रस्त्यावर पलटी झाल्याची धक्कादायक घटना जळगावमध्ये आज सकाळी घडली. या अपघातात 30 हून अधिक विद्यार्थी आणि दोन शिक्षक जखमी झाल्याची प्राथमिक माहिती मिळते. जळगाव जिल्ह्यातील पहुर – शेंदुर्णी दरम्यान स्कूल बस उलटून अपघात झाला. जखमी विद्यार्थी आणि शिक्षकांना स्थानिकांनी तात्काळ मदत कार्य करत खाजगी वाहनातून रुग्णालयात दाखल केले. घटनेची माहिती मिळताच पहुर पोलीस घटनास्थळी दाखल झाले. पुढील तपास पोलीस करत आहेत.
शाळेपासून 5 किमी अंतरावर अपघात घडला
शेंदुर्णी येथील सरस्वती विद्यामंदिर शाळेची ही बस आहे. सकाळच्या सत्रातील विद्यार्थ्यांना घेऊन ही बस शाळेकडे चालली होती. याचवेळी पहुर-शेंदुर्णी दरम्यान बसचे स्टेअरिंग रॉड तुटल्याने बस रस्त्यावर पलटली. शाळेपासून पाच किलोमीटर अंतरावर ही घटना घडली. यावेळी बसमध्ये 30 हून अधिक विद्यार्थी आणि शिक्षक प्रवास करत होते. बस पलटल्याने सर्व जण जखमी झाले आहेत. सुदैवाने यात कोणतीही जीवितहानी किंवा मोठी दुखापत झाली नाही.
स्थानिकांनी तात्काळ मदतकार्य केले
अपघात घडताच स्थानिक रहिवासी तात्काळ धावत आले. स्थानिकांनी बसमधील विद्यार्थी, शिक्षकांना बाहेर काढून खाजगी वाहनातून रुग्णालयात नेले. पहूर पोलिसांना अपघाताची माहिती देण्यात आली. माहिती मिळताच पोलिसांनी घटनास्थळी दाखल होत पंचनामा केला. पहूर पोलिसात अपघाताची नोंद करण्यात आली आहे.
