Mumbai Rains News LIVE Updates : पावसाचा जोरदार तडाखा, कुठे झाडं उन्मळून पडतायेत, तर कुठे रस्त्यांना पाण्याचं स्वरुप… जनजीवन विस्कळीत

मुंबई-गोवा महामार्गावर कशेडी घाटात दरड कोसळली आहे. मुसळधार पावसामुळे दरड कोसळली आहे. दुसरीकडे महामार्ग देखील महामार्ग ठप्प झाला आहे.

पुण्याहून मुंबईसाठी निघालेल्या 4 एसटी बसेस ‘उर्से टोल नाका’ परिसरात अडकल्या आहेत. यामुळे त्यांना सुरक्षितपणे पुन्हा पुण्यात माघारी बोलावण्यात आल्यात. त्यामुळे रस्ता मोकळा होईपर्यंत प्रवासाचे नियोजन करू नये, अशा सुचना प्रशासनाने केल्या आहेत.

मुंबईत मुसळधार पाऊस सुरू आहे. या पावसाचा फटका रस्त्यावरील वाहतुकीलाही बसला आहे. अंधेरीतील सब वे वाहतुकीसाठी बंद करण्यात आला आहे. सब वेमध्ये पाणी साचल्याने हा निर्णय घेण्यात आलाय.

कोकणामध्ये मुसळधार पाऊस पडतोय. या पावसाचा परिणाम कोकण रेल्वेवर होतोय. मुंबईवरून कोकणात येणाऱ्या काही एक्सप्रेस गाड्या उशिरा धावताहेत. तुतारी एक्सप्रेस तब्बल 2 तास उशिराने धावतेय. इतर काही गाड्या देखील सुमारे 4 तासांनी धावाताहेत.

रायगडमध्ये पुराचा हाहाकार पाहायला मिळत आहे. जिल्ह्यातील 4 नद्यांनी धोकादायक पातळी ओलांडली आहे. या पावसामुळे रायगडकरांचं जनजीवन विस्कळीत झालं आहे. पावसाच्या पार्श्वभूमीवर प्रशासन देखील अलर्ट मोडवर आहे.

मुंबईतील सकाळची विमानसेवा रद्द झाल्या आहेत. त्यामुळे विमान प्रवासात अडचणी झाल्यातरी विधानसभेचे कामकाजावर परिणाम होणार नाही. राज्यातील अनेक आमदार विमानतळावरून थेट विधानसभेत पोहोचू शकतात. त्यामुळे उपस्थितीत मोठी अडचण येणार नसल्याचे बोलले जात आहे. विधानसभेच्या कामकाजासाठी अनेक आमदारांचे प्रश्न सूचीबद्ध आहेत, तसेच संबंधित कामेही महत्त्वाचे आहेत.

बदलापुरात उल्हास नदीने धोक्याची पातळी ओलांडली आहे. उल्हास नदीच्या पाण्याची पातळी 17.50 मीटरवर पोहोचली आहे. या पार्श्वभूमीवर बदलापूर नगरपालिकेची आपत्कालीन यंत्रणा सज्ज झाली आहे. यामुळे 12 हजार लोकांच्या निवासाची व्यवस्था करण्यात आली आहे.

मुसळधार पावसामुळे मुंबई-गोवा ठप्प झाला आहे. मागील पाच तासांपासून हा मार्ग ठप्प झाला आहे. अंबा नदीचं पाणी महामार्गावर आल्याने हा मार्ग ठप्प झालाय. त्यामुळे वाहनधारकांची मोठी गैरसोय झाली आहे.

आळंदीत जोरदार पाऊस सुरू आहे. मुसळधार पावसामुळे आळंदीतील इंद्रायणी नदीच्या पाणी पातळीत वाढ झाली आहे. त्यामुळे नदीजवळ राहणाऱ्या नागरिकांना सतर्कतेचा इशारा देण्यात आलाय.

मुसळधार पावसाचा रेल्वे वाहतुकीला मोठा फटका; मुंबई–पुणे संपर्क खंडित, तर अप डाऊन मार्गावरील लोकल सेवा देखील 15 मिनिटे उशिराने सुरु आहे. कल्याण स्थानकावर प्रवाशांची गर्दी जमली आहे. मुसळधार पावसामुळे मुंबई–पुणे रेल्वे मार्गावर दरड कोसळून रेल्वे वाहतूक विस्कळीत झाली आहे. रेल्वे प्रशासनाच्या निर्णयामुळे हजारो प्रवाशांना प्रवासात अडचणींचा सामना करावा लागत आहे. लोकल सेवा विस्कळीत झाल्याने कल्याण रेल्वे स्थानकावर प्रवाशांची मोठी गर्दी, चौकशी कक्षांवर  वर्दळ वाढली आहे.

सांगलीच्या वाळवा तालुक्यासह वारणा नदीच्या पाणलोट क्षेत्रात गेल्या चार दिवसांपासून सुरू असलेल्या मुसळधार आणि संततधार पावसामुळे वारणा नदीच्या पाण्याच्या पातळीत झपाट्याने वाढ झाली आहे. नदीला पूरसदृश परिस्थिती निर्माण झाली असून, चिकुर्डे येथील वारणा नदीवरील छोटा बंधारा पूर्णपणे पाण्याखाली गेला आहे. तर सांगली आणि कोल्हापूर या दोन जिल्ह्यांना जोडणारा ऐतवडे खुर्द येथील वारणा नदीवरील मुख्य पुलाला पाणी अगदी घासून वाहत असल्याने या भागातील वाहतूक आणि जनजीवन विस्कळीत झाले आहे.

पर्यटन नगरी लोणावळ्यामध्ये विक्रमी पावसाची नोंद झाली आहे. गेल्या 24 तासांत तब्बल 625 मिलीमीटर पाऊस बरसलाय. यंदाच्या मोसमातील सर्वाधिक पावसाची नोंद झालीये. मात्र यावर्षी आत्तापर्यंत 1715 मिलीमीटर पाऊस झालाय. गेल्या वर्षी आजच्या दिवसापर्यंत तब्बल 2502 मिलीमीटर इतका पावसाची नोंद झाली होती. त्यामुळे दडी मारलेल्या पावसाने जोरदार परसात 24 तासांमध्ये मागील सर्व विक्रम मोडले आहे.