आम्ही आहोत ना… घाबरतोस कशाला? त्याचा जीव वाचवण्यासाठी मुंबईकरांनी अख्खी बसच ढकलली; पाहा व्हिडीओ

आज सकाळी मुंबईतील भांडुप परिसरात बेस्ट बसचा अपघात झाल्याची घटना समोर आली आहे. कोकणनगर येथील क्रिटिकल रुग्णालयाजवळ भरधाव बेस्ट बसने पादचाऱ्यासह अनेक वाहनांना धडक दिली होती. बस चालकाने अचानक नियंत्रण गमावल्याने हा अपघात झाल्याचे समोर आले होते. आता या अपघाताचा व्हिडिओ समोर आला आहे. यात इलेक्ट्रिक बेस्ट बसच्या पाठीमागच्या बाजूला अडकलेल्या पादचाऱ्याला बाहेर काढण्यासाठी प्रवाशांनी अख्खी बस ढकलली असल्याचे समोर आले आहे. याबाबत सविस्तर माहिती जाणून घेऊयात.

प्रवाशांनी वाचवला पादचाऱ्याचा जीव

समोर आलेल्या माहितीनुसार, बस कोकणनगरकडे वळत असताना चालकाला बस योग्य प्रकारे वळवता आली नाही. त्यामुळे बस रिव्हर्स घेण्यात आली. रिव्हर्स घेत असताना नियंत्रण सुटले आणइ बसचा मागील भाग एका पादचाऱ्याला लागला. त्यामुळे तो पादचारी मोठ्या झाडांच्या कुंडी आणि बसच्या मागील भागामध्ये अडकला. या पादचाऱ्याची सुटका करण्यासाठी घटनास्थळी नागरिकांनी गर्दी केली आणि बस ढकलली. यामुळे बस पुढे सरकली आणि त्या पादचाऱ्याला बाहेर काढण्यात यश आले.

जखमी पादचाऱ्यावर रुग्नालयात उपचार सुरू

या अपघातात पादचाऱ्याच्या दोन्ही मांड्यांना गंभीर दुखापत झाली असून मोठ्या प्रमाणात रक्तस्राव झाला. बसच्या कंडक्टरने जखमी व्यक्तीला तातडीने उपचारासाठी मुलुंड येथील अग्रवाल रुग्णालयात दाखल केले असून पोलिसांनी या घटनेच्या तपासाला सुरुवात केली आहे. यातील दोशींवर आता कठोर कारवाईची मागणी करण्यात येत आहे.

लातूरमध्ये स्कूलबस उलटली, 30 ते 35 विद्यार्थी जखमी

लातूर जिल्ह्यातल्या चाकुर तालुक्यातील राचानावाडी जवळ स्कूल बस उलटल्याने 30 ते 35 विद्यार्थी जखमी झाले आहेत. यापैकी दोन गंभीर जखमी विद्यार्थ्यांना उपचारासाठी लातूरला हलवण्यात आले आहे. सांडोळ , महाडोळ येथील विद्यार्थी स्कूल बसने राचनावाडीकडे निघाले होते. चालक मोबाईलवर बोलत होता त्यामुळे नियंत्रण सुटल्याने बस रस्त्याकडेच्या खड्ड्यात जाऊन उलटली असं जखमी विद्यार्थ्यांनी सांगितले आहे. किरकोळ जखमी मुलांना चाकूरच्या रुग्णालयात तपासणी आणि प्राथमिक उपचार करून घरी पाठवण्यात आले असल्याची माहिती समोर आली आहे.