मुंबईकरांनी 11 वर्षांचा तोडला रेकॉर्ड, इतक्या कोटींच्या घरांना सर्वाधिक पसंती

मुंबई | 1 नोव्हेंबर 2023 : रिअल इस्टेटनुसार देशात मुंबई हे सर्वात महागडं शहर आहे. येथे घराचं स्वप्न सर्वात महाग आहे. घर घेण्यासाठी एकाची नाही दोघांची कमाई गाठीशी असणे आवश्यक आहे. कोरोनानंतर देशात घरांच्या किंमतीत मोठी वाढ होत आहे. पण देशाची राजधानी मुंबईवर या सर्व गोष्टींचा कुठलाच परिणाम होताना दिसत नाही. गेल्या महिन्यात या शहरात 10 हजारांहून अधिक घरांची नोंदणी झाली आहे. हा गेल्या 11 वर्षांमधील रेकॉर्ड आहे. यापूर्वीच सर्व रेकॉर्ड इतिहास जमा झाले आहेत. यामध्ये एक कोटी अथवा त्यापेक्षा अधिक किंमतींच्या घरांची पण मोठी विक्री झाली आहे.

विक्रम झाला, सरकारची कमाई पण

महाराष्ट्र सरकारच्या नोंदणी आणि मुद्रांक विभागाच्या आकड्यांनी ही बाब समोर आणली. त्यानुसार, ऑक्टोबर महिन्यात मुंबईत एकूण 10,601 मालमत्तांची नोंद झाली. या मालमत्तांच्या नोंदणीमुळे सरकारच्या तिजोरीत 835.32 कोटी रुपयांचा महसूल जमा झाला. गेल्या 11 वर्षांतील हे विक्रमी उत्पन्न असल्याचा दावा मुद्रांक विभागाने केला आहे. ज्या मालमत्तांची नोंदणी झाली आहे. त्यातील जवळपास 80 टक्के मालमत्ता रहिवाशी वापरासाठी तर 20 टक्के मालमत्ता या व्यावसायिक वापरासाठी नोंदणी करण्यात आल्या आहेत.

सणासुदीत वाढली संख्या

गेल्या महिन्यात नवरात्र आणि दसरा सण झाला. त्यापूर्वी गणेश चतुर्थी होऊन गेली. या काळात घर बुकिंग करणे अनेकांनी पसंत केले. त्यामुळे एकाच महिन्यात घरांची विक्रमी बुकिंग झाली. केवळ भारतीय नागरिकांनीच नाही तर एनआरआय, अनिवासी भारतीय नागरिकांनी पण अनेक मालमत्ता खरेदी केल्या. दिवाळीच्या काळात आणि नववर्षाच्या पार्श्वभूमीवर मालमत्ता विक्रीत वाढ होण्याची शक्यता वर्तविण्यात येत आहे.

महागड्या घरांची जास्त विक्री

मुंबईत यावर्षी जानेवारी ते ऑक्टोबर याकाळात एक करोड वा त्यापेक्षा अधिक किंमतीची अधिक घरांची विक्री झाली. प्रापर्टी कन्सल्टिंग फर्म नाईट फ्रँकने हा अंदाज वर्तवला आहे. या जवळपास 10 महिन्यात 1,04,832 मालमत्तांची नोंदणी झाली. त्यातील 58,706 मालमत्तांची किंमत एक कोटी रुपयांहून अधिक असल्याचे समोर आले आहे. 46,126 मालमत्तांची किंमत एक कोटी रुपयांहून कमी आहे.