नवी मुंबईत पकडला, केरळात गेला, ATSला मोठी लीड; आंतरराष्ट्रीय कनेक्शन…नागरिकांना महत्त्वाचं आवाहन
Navi mumbai ats action : नवी मुंबईतील ऐरोली परिसरातून महाराष्ट्र एटीएसने यश सिंग या 20 वर्षीय तरुणाला ताब्यात घेतलं. सोशल मीडियाच्या माध्यमातून तो देशविघातक घटकांच्या संपर्कात असल्याचा आरोप आहे. मुंबईतील संवेदनशील ठिकाणांची, विशेषतः कुलाब्यातील छाबाड हाऊसची रेकी करण्याची जबाबदारी त्याच्यावर सोपवण्यात आल्याची माहिती तपासात समोर आली आहे.
सोशल मीडियाच्या माध्यमातून आंतरराष्ट्रीय दहशतवादी संघटना आणि देशविघातक घटकांच्या संपर्कात राहून मुंबईतील संवेदनशील ठिकाणांची रेकी केल्याप्रकरणी २० वर्षीय तरुणाला अटक करण्यात आली आहे. यश सिंग असे या तरुणाचे नाव असून, नवी मुंबईतील ऐरोली परिसरातून महाराष्ट्र दहशतवादविरोधी पथकाने (ATS) त्याला ताब्यात घेतले होते. त्यानंतर केरळ पोलिसांनी नवी मुंबईत येऊन त्याला अटक केली. केरळमधील त्रिशूर येथे दाखल असलेल्या UAPA गुन्ह्याच्या तपासात या तरुणाचे धागेदोरे समोर आल्याची माहिती आहे.
ज्यू आणि परदेशी नागरिक, त्यांच्या कंपन्या, वाहने तसेच संवेदनशील ठिकाणांचे फोटो आणि लोकेशन पाठवण्यासाठी यश सिंगला आर्थिक मोबदला दिल्याचा तपास यंत्रणांचा दावा आहे. केरळमधील त्रिशूर ईस्ट पोलीस ठाण्यात दाखल असलेल्या UAPA प्रकरणाशी त्याचे धागेदोरे जोडले गेले आहेत. नवी मुंबई एटीएसने माहिती दिल्यानंतर केरळ पोलिसांनी महाराष्ट्रात येऊन त्याला अटक केली.
छाबाड हाऊससह संवेदनशील ठिकाणांची रेकी
तपासात समोर आलेल्या माहितीनुसार, यश सिंग याला मुंबईतील संवेदनशील ठिकाणांची माहिती गोळा करण्याचे काम सोपवण्यात आले होते. विशेषतः कुलाब्यातील ज्यू प्रार्थनास्थळ असलेल्या छाबाड हाऊस (सिनॅगॉग) परिसराची रेकी करण्याची जबाबदारी त्याच्याकडे होती. ज्यू नागरिक, परदेशी नागरिक, त्यांच्या कंपन्या, वाहने आणि संबंधित ठिकाणांचे फोटो काढून त्यांची अचूक लोकेशन पाठवण्यास त्याला सांगण्यात आले होते.
टेलिग्राम ग्रुपमधून संपर्क, पैशांचाही मोबदला
यश सिंग हा टेलिग्रामवरील देशविघातक घटकांच्या ग्रुपच्या संपर्कात असल्याचे तपासात समोर आले आहे. संवेदनशील ठिकाणांची माहिती आणि छायाचित्रे पाठवण्याच्या कामासाठी त्याने वेळोवेळी आर्थिक मोबदला स्वीकारल्याचेही निष्पन्न झाले आहे. सोशल मीडियाच्या माध्यमातून आंतरराष्ट्रीय गुन्हेगारी टोळ्या आणि देशविघातक घटकांशी त्याचा संपर्क असल्याची माहिती तपास यंत्रणांना मिळाली होती.
नवी मुंबई ATS ने याबाबत त्रिशूर पोलिसांना माहिती दिल्यानंतर केरळ पोलिसांचे पथक नवी मुंबईत दाखल झाले. त्यानंतर यश सिंगला अटक करण्यात आली. या प्रकरणाचे धागेदोरे केरळमधील त्रिशूर ईस्ट पोलीस ठाण्यात दाखल असलेल्या UAPA गुन्ह्यातील इतर आरोपींपर्यंत पोहोचण्याची शक्यता आहे.
दरम्यान, सोशल मीडियावर पैशांचे आमिष दाखवून बेरोजगार तरुणांचा दहशतवादी कारवायांसाठी वापर केला जात असल्याने नागरिकांनी अनोळखी व्यक्तींना संवेदनशील ठिकाणांचे फोटो किंवा माहिती पाठवू नये, असे आवाहन ATS ने केले आहे.
