Tukaram Mundhe : नियम मोडणाऱ्या प्रसिद्ध डॉमिनोज पिझ्झाला तुकाराम मुंढेंनी दिला दणका
Tukaram Mundhe : अन्न व औषध प्रशासन विभागाचे आयुक्त म्हणून तुकाराम मुंढे यांनी सध्या कारवाईचा धडका लावला आहे. दररोज FDA कडून धाडसत्र सुरु आहे.
अन्न व औषध प्रशासन विभागाचे आयुक्त म्हणून तुकाराम मुंढे यांनी सध्या कारवाईचा धडका लावला आहे. दररोज FDA कडून धाडसत्र सुरु आहे. त्यामुळे अनेक मोठमोठी हॉटेल्स, उपहारगृह आणि रेस्टॉरंट मालकांचे धाबे दणाणले आहेत. तुकराम मुंढे यांच्या FDA ने मोठ्या फूड जॉइंटवर कारवाई केली आहे. थेट डॉमिनोज पिझ्झाच्या आऊटलेटवर धाड टाकली आहे. व्हेज-नॉन व्हेजसाठी एकच प्लॅटफॉर्म वापरला जात होता. डॉमिनोज पिझ्झाच्या चार आउटलेट्सचे परवाने निलंबित करण्यात आले आहेत. यात तीन मुंबईतील आहेत. डॉमिनोज पिझ्झाच्या आऊटलेटवर धाड टाकल्यानंतर तिथे तपासणीमध्ये अन्न सुरक्षा आणि स्वच्छता मानकांचं उल्लंघन होत असल्याचं आढळून आलं. ही कारवाई राज्यभरात अन्न व औषध प्रशासन विभागाकडून सुरु असलेल्या कारवाईचा भाग आहे.
विलेपार्ले पश्चिम, बोरिवली पश्चिम आणि घाटकोपर पश्चिम येथील डॉमिनोज पिझ्झा आउटलेट्सचे परवाने निलंबित करण्यात आले आहेत. त्याशिवाय मलकापूर आणि सातारा जिल्ह्यातील डॉमिनोज आउटलेटसचे परवाने निलंबित करण्यात आलेत. ज्यूबिलंट फूडवर्क्स अंतर्गत हे आउटलेट्स सुरु होते.
त्यामुळे त्यांचा परवाना निलंबित करण्यात आला
विलेपार्ले पश्चिमेला असलेल्या डॉमिनोज आउटलेटमध्ये FDA अधिकाऱ्यांना अनेक कमतरता आढळून आल्या. FSSAI परवाना नीट प्रदर्शित होत नव्हता, पिण्याच्या पाण्याची खराब व्यवस्था, अन्न स्टोरेज व्यवस्था, पेस्ट कंट्रोल एकूणच अस्वच्छता मोठ्या प्रमाणात होती. त्यामुळे त्यांचा परवाना निलंबित करण्यात आला. फ्रोझन अन्न पदार्थांच्या तापमानावर लक्ष द्या, खाद्यपदार्थांच वर्गीकरण, पेस्ट कंट्रोल, स्वच्छता व्यवस्था याकडे लक्ष देण्याच्या सूचना देण्यात आल्या आहेत.
