पार्ल्यापासून वांद्र्यापर्यंत कसे हादरे देतो ते पाहाच, शिंदे गटाच्या नेत्याचा इशारा; ठाकरे गट अडचणीत येणार?
कर्नाटकाने आगाऊपणा करू नये. जे काही शांततेत चाललं आहे, ते सुरू ठेवावं. सुप्रीम कोर्टात वाद सुरू आहे. जे होईल त्याला आम्ही सामोरे जाणार आहोत.
नागपूर: ठाकरे गटाचे नेते संजय राऊत यांनी नागपुरात येऊन राजकीय बॉम्बस्फोट करणार असल्याचा दावा केला होता. मात्र, गेल्या तीन दिवसात राऊत यांनी एकही गौप्यस्फोट न केल्याने आता शिंदे गटाकडून ठाकरे गटाची खिल्ली उडवली जात आहे. स्फोट करण्यासाठी शिवसेनेकडे दारुगोळा शिल्लक नाहीये. राऊत त्या दिवशी बोलून फसले, अशी टीका करतानाच आता मी पार्ल्यापासून वांद्र्यापर्यंत कसे हादरे देतो ते पाहाच, असा इशारा शिंदे गटाचे नेते भरतशेठ गोगावले यांनी दिला आहे. ते मीडियाशी संवाद साधत होते.
उदय सामंत यांनी संजय राऊत यांच्या दाव्याचा समाचार घेतला आहे. आम्ही बॉम्बशोधक पथक आणलंय. त्यामुळे स्फोट होऊ शकला नाही, असं उदय सामंत म्हणाले आहेत. मुंबईहून येऊन जर ठाकरे गटाचे नेते काहीच बोलू शकत नसतील तर त्यांच्या स्फोटातला दारुगोळा संपलाय हे समजून घ्या, असा चिमटा भरतशेठ गोगावले यांनी काढला.
माझ्याकडे स्फोट करण्यासारखी प्रकरणं आहेत. त्यामुळे मी सभागृहात सर्व विषय मांडणार आहे. पार्ल्यापासून वांद्र्यापर्यंत कसे हादरे देतो ते तुम्ही बघाच, असा इशाराच गोगावले यांनी दिला आहे. त्यामुळे एकच खळबळ उडाली आहे.
त्यांनी केलेल्या चुका माझ्याकडे आहेत. सभागृहात विषय मांडल्यानंतर वस्तुस्थिती समजेल. येत्या दोन दिवसात ही वस्तुस्थिती समोर येईल. त्यानंतर तुम्हाला पार्ल्यापासून वांद्र्यापर्यंत फटाके वाजताना दिसतील, असा दावाही त्यांनी केला.
ठाकरे गटाचे अनेक घोटाळे आहेत. त्याची एक झलक त्यांना पाहायला मिळणार आहे, असंही ते म्हणाले. त्यामुळे गोगावले आज सभागृहात काय स्फोट करतात याकडे सर्वांचं लक्ष लागलं आहे.
यावेळी त्यांनी सीमावादावरही भाष्य केलं. मुंबई कुणाच्या बापाची नाहीये. महाराष्ट्रासाठी 105 जणांनी हौतात्म्य दिलं आहे. त्यामुळे कर्नाटकाच्या मुख्यमंत्र्यांनी जास्त बोलू नये. एक इंचच काय अर्धा इंचही जमीन कर्नाटकाला देणार नाही, हे मुख्यमंत्री आणि उपमुख्यमंत्र्यांनी ठणकावून सांगितलं आहे. सीमाभागातील गावांना सुविधा देण्याचं काम सुरू करण्यात आलं आहे, असंही त्यांनी सांगितलं.
कर्नाटकाने आगाऊपणा करू नये. जे काही शांततेत चाललं आहे, ते सुरू ठेवावं. सुप्रीम कोर्टात वाद सुरू आहे. जे होईल त्याला आम्ही सामोरे जाणार आहोत. मुंबईचं सोडा पण कर्नाटकाच्या नेत्यांनी कोणतीही भाषा करू नये. मुंबई तर लांब राहिली, त्यांनी साधं कोल्हापूरचंही नाव घेऊ नये, असा इशाराच त्यांनी दिला.
