पवारांना धमकी येणं निषेधार्ह, धमकी देणाऱ्यांचा ब्रेन शोधून काढा – छगन भुजबळांची मागणी

मुंबई : राष्ट्रवादीचे सर्वेसर्वा शरद पवार यांना जीवे मारण्याची धमकी मिळाल्यानंतर राष्ट्रवादीचे नेते आक्रमक झाले आहेत. अशी धमकी देणाऱ्यांचा शोध लावून कडक कारवाई झाली पाहिजे, अशी मागणी राष्ट्रवादीचे नेते छगन भुजबळ यांनी केली आहे. राष्ट्रवादी काँग्रेसमध्येही या प्रकारामुळे खळबळ उडाली आहे. खासदार सुप्रिया सुळे यांनी या प्रकरणाची गंभीर दखल घेतली असून त्या तातडीने पोलीस आयुक्तांना भेटल्या. तर छगन भुजबळ यांनी याप्रकरणी कडक कारवाई व्हावी अशी मागणी केली.

शरद पवार आणि राऊत बंधू यांना धमकी देणं ही अतिशय संतापजनक आणि काळजीची गोष्ट आहे. आत्तापर्यंत महाराष्ट्रात दाभोलकर, पानसरे तसेच पलीकडे राज्यात लंकेश, कलबुर्गी या सगळ्यांचे मनूवृत्तीच्या लोकांनी जीव घेतले आहेत. दुर्दैवाची गोष्ट म्हणजे भारत सरकार काय किंवा महाराष्ट्र सरकार काय , कोणीच या ( हत्यांच्या) मुळाशी जात नाहीत. आणि या सगळ्यांचा जीव घेणारे कोण आहेत, याचा इतकी वर्ष उलटूनही त्यांचा शोध लागत नाही, काहीही कारवाई होत नाही. सरकार काय करतंय , असा सवाल भुजबळ यांनी केला. हे सगळ शोधून काढलं, मुळाशी गेलं तर हे सर्व संपेल, असेही ते म्हणाले.

या धमकीला पवार साहेब किंवा राऊत बंधू भीक घालणार नाहीत, असेही भुजबळ यांनी सांगितले. भारत आणि महाराष्ट्र सरकारने याचा गंभीर विचार केला पाहिजे. या सगळ्याच्या मुळाशी असलेल्या मेंदूचा शोध घेऊन त्यांना पकडलं पाहिजे, अशी मागणी भुजबळांनी केली.

दरम्यान या धमकीनंतर शरद पवार यांच्या निवासस्थानाबाहेरील सुरक्षेत वाढ करण्यात आली आहे.

शरद पवार यांना मिळाली होती धमकी

राजकारण महाराष्ट्राचे या फेसबुक पेजवरून शरद पवार यांना जीवे मारण्याची धमकी देण्यात आली आहे. त्यावर नर्मदाबाई पटवर्धन असं नाव आहे. शरद पवार भाX खाव तुझा लवकरच दाभोळकर होणार, अशी धमकी या फेसबुकवरून देण्यात आली आहे. तर सौरभ पिंपळकर याने ट्विटर अकाऊंटवरून शरद पवार यांना धमकी दिली आहे. आयुष्यभर सुपारी कात्रत खाल्ल्यामुळे औरंगजेबाच तोंड मरताना वाकडं होऊन मेलं म्हणते हे खरं आहे का? असं असेल तर इतिहास पुनरावृत्ती करणार म्हणजे, अशी धमकी सौरभ पिंपळकर या ट्विटर अकाऊंटवरून ही धमकी देण्यात आली आहे.

तो भाजपचा कार्यकर्ता?

सौरभ पिंपळकर या नावाने असलेल्या ट्विटर अकाऊंटवर ही व्यक्ती अमरावतीची असल्याचं म्हटलं आहे. तसेच भाजपचा कार्यकर्ता असल्याचंही त्याच्या अकाऊंटवर नोंदवलेलं आहे. मात्र, हे अकाऊंट ओरिजिनल आहे की फेक आहे हे अद्याप स्पष्ट झालेलं नाही.