Nida Khan : निदा खान प्रकरणात एमआयएमचा नगरसेवक बाराच्या भावात… पोलिसांनी निदाला पकडताच थेट… काय घडलं कोर्टात जाण्यापूर्वी?

टीसीएस प्रकरणातील आरोपी निदा खान हिला अखेर छत्रपती संभाजी नगरमधून अटक करण्यात आली आहे. गेले 25 दिवस निदा खान पोलिसांना गुंगारा देऊन लपली होती. कोर्टाने तिचा जामीन नाकारल्यानंतर अखेर पोलिसांनी तिला शोधून काढले. तिच्यासोबत पाच जणांनाही अटक करण्यात आली आहे. विशेष म्हणजे या प्रकरणात एमआयएमच्या नगरसेवकाचे बारा वाजले आहेत. पोलिसांनी एमआयएमच्या नगरसेवकाला सहआरोपी केलं आहे. निदा खानला आश्रय दिल्याचा त्याच्यावर आरोप आहे. त्यामुळे मोठी खळबळ उडाली असून आता एमआयएम हा पक्ष सत्ताधारी आणि विरोधकांच्या टार्गेटवर आला आहे.

निदा खानच्या अटकेनंतर नाशिक पोलिसांनी प्रतिक्रिया व्यक्त केली आहे. निदा खानला आश्रय देणाऱ्या एमआयएमच्या नगरसेवकालाही सहआरोपी केलं आहे, अशी माहिती नाशिकचे पोलीस आयुक्त संदीप कर्णिक यांनी दिली आहे. एमआयएमचे नगरसेवक मतीन पटेल याने निदाला आश्रय दिल्याचे पोलीस तपासात निष्पन्न झाले आहे. त्यामुळे एकच खळबळ उडाली आहे.

आश्रय दिल्याचं उघड

निदा खानला अटक करण्यासाठी नाशिक शहर आणि छत्रपती संभाजी नगर पोलिसांनी संयुक्त कारवाई केली. निदा खान हिला छत्रपती संभाजी नगरच्या नरेगाव परिसरातून ताब्यात घेण्यात आले आहे. नरेगाव परिसरातील स्थानिक नगरसेवक मतीन मजीत पटेल यांनी आश्रय दिल्याचं निष्पन्न झालं आहे. पटेल यांना या गुन्ह्यात आरोपी करण्यात आले आहे. या कारवाईत आम्हाला सहकार्य केल्याबद्दल छत्रपती संभाजी नगर पोलीस आयुक्तांचे आभार मानतो, असं संदीप कर्णिक यांनी म्हटलं आहे.

कोर्टात हजर करणार

दरम्यान, निदा खानला 3 वाजता नाशिक कोर्टात हजर करणार आहेत. सरकारी वकिलांकडून निदाची पोलिस कोठडी मागितली जाणार आहे. एमआयएमचे नगरसेवक मतीन पटेल याच्या सहभागा बाबत नाशिक पोलिस कोर्टात माहिती देणार आहे. यापूर्वी या प्रकरणात 7 आरोपी पोलिसांच्या ताब्यात आहेत. निदा खानच्या अटकेनंतर टीसीएस प्रकरणातील सर्व आरोपी आता गजाआड झाले आहेत. आता निदा खानला कोर्टात हजर केल्यावर कोर्ट काय निर्णय देते याकडे सर्वांचं लक्ष लागलं आहे.