शेवटी काळजाच तुकडा ना तो… ताटातुट झालेल्या बछडयांना ‘ती’ पुन्हा घेऊन गेली, पाहा VIDEO
बिबट मादी आणि तीच्या तीन पिल्लांची ताटातुट झाली होती. वन विभाग आणि रेस्क्यू टीमच्या माध्यमातून ती भेट घडवून आणण्यात आली आहे. या संपूर्ण प्रकार सीसीटीव्ही कॅमेऱ्यात कैद झाला आहे.
पुणे : अलीकडच्या काळामध्ये जंगली प्राणी आणि मानव यांच्यामध्ये फारसं अंतर राहिलेलं नाहीये. शेतातच आता जंगली प्राणी येऊ लागल्याने त्यांच्या उत्पत्तीचं ठिकाण देखील शेतीच असल्याचं अनेकदा पाहायला मिळत आहे. विशेषतः ज्या ठिकाणी दाटीवाटीचे पीक घेतलं जातं जसं की, उसासारखे पीक घेतलं जातं तिथे मादी बिबट बछड्यांना जन्माला घालत असते. मात्र, याच वेळेला वेळेला जर कधी ऊसतोड सुरू झाली तर मादी बिबट आणि बछड्यांमध्ये ताटातूट होत असते. त्यामुळे अनेकदा मादी सैरावैरा धावू लागते. आपल्या बछड्या पासून दूर गेल्याची भावना तिच्या मनात निर्माण झाल्याने त्याचा जीव अक्षरशः कासावीस झाल्याचं दिसून येतं. त्यामुळे आई आणि पिल्लांची भेट घडून आणण्यासाठी वनविभागाने अनेकदा महत्त्वाची भूमिका बजावली आहे.
अशीच एक भेट पुण्यातील दौंड तालुक्यात देलवडी येथे शेतकरी संदीप शेंडगे यांच्या शेतात घडवून आणली आहे. उसतोड सुरू असतांना उसतोड कामगारांना तीन बिबट्याची पिल्ले आढळून आली होती. त्यांनी तात्काळ याबाबत शेतकरी संदीप शेंडगे यांना कळवली होती.
शेतकरी संदीप शेंडगे यांनी लागलीच उसतोड थांबवून वन विभागाला याबाबत माहिती दिली होती. वनविभागाच्या अधिकाऱ्यांनीही जवळ कुणीही जाऊ नका मात्र लक्ष राहूद्या असा सल्ला दिला होता. त्यानंतर रेस्क्यू टीमसह वन विभागाचे अधिकारी आणि कर्मचारी तात्काळ दाखल झाले होते.
संपूर्ण परिस्थिती पाहिल्यानंतर मादी बिबट आणि बछडयांची भेट घडवून आणण्याचे थरविण्यात आले होते. ईको रेस्क्यू टीम आणि वन विभाग यांच्या समन्वयाने संपूर्ण प्रक्रिया राबविण्यात आली होती.
अंधार पडल्यानंतर मादी बिबट् येण्याची वेळ होते. आपल्या बछडयांची भेट घेण्यासाठी मादी येईल यावेळी रेस्क्यू टीमने बछडयांना क्रेट मध्ये झाकून ठेवले होते. जवळपास एक सीसीटीव्ही कॅमेरा देखील लावला होता. म्हणजे संपूर्ण हालचाल त्यामध्ये कैद होईल.
जवळपास तीन पिल्ले होती. मादी बिबट बरोबर अंधार पडल्यावर शोध घेण्यासाठी आलेली असतांना तीच्या निदर्शनास क्रेट दिसले. लागलीच मादीने धाव घेतली आणि बछडे दिसले. त्यात मादीने अलगद क्रेट बाजूला करून पिल्ले उचलून नेले.
ही संपूर्ण घटना सीसीटीव्ही कॅमेऱ्यात कैद झाली आहे. मादी आणि बिबट्याची भेट पाहून गावकऱ्यांनी आणि शेतकऱ्यांसह उसतोड कामगारांनी सुटकेचा निश्वास टाकला. यानंतर मात्र वनविभागसह रेस्क्यू टीमचं सर्वत्र कौतुक केले जात आहे.
