पुणे : महापालिका हद्दीत समाविष्ट २३ गावांसह पुणे महानगर प्रदेश विकास प्राधिकरणाचा (PMRDA) प्रारूप विकास आराखडा 2 ऑगस्ट रोजी प्रसिद्ध करण्यात आला. या विकास आराखड्यावर हरकती आणि सूचना दाखल करण्यासाठी ३० दिवसांची मुदत देण्यात आली आहे. यापैकी आता १५ दिवस शिल्लक आहेत. त्यामुळे नागरिकांनी आपल्या सूचना आणि हरकती दाखल कराव्यात असं आवाहन करण्यात आलं आहे. (Few days left to give objections and suggestions on PMRDA development plan)
हरकती आणि सूचनांवर सुनावणी घेऊन काही दिवसांत विकास आराखडा मंजूर केला जाणार आहे. पुणेकरांना पीएमआरडीएच्या औंध इथल्या महाराजा सयाजीराव गायकवाड उद्योग भवन इथल्या कलादालनात हा विकास आराखडा उलपब्ध करून देण्यात आला आहे. सोबतच पीएमआरडीएच्या www.pmrda.gov.in या वेबसाईटवरही विकास आराखडा पाहता येईल.
पुणे महानगर विकास प्राधिकरणाचे क्षेत्रफळ एकूण क्षेत्र 6914.26 चौ. किमी आहे. हे राज्यात सर्वात मोठं आणि देशात तिसऱ्या क्रमांकाचं सर्वात मोठं क्षेत्र आहे. यामध्ये २ रिंग रोड, हायस्पीड आणि क्रिसेंट रेल्वे, १० मेट्रो मार्गिका, १५ नागरी केंद्रे, ४ प्रादेशिक केंद्रे, पर्यटनस्थळं, विद्यापीठे, जैवविविधता उद्याने, अक्षय ऊर्जा निर्मिती केंद्रे, अग्नीशमन केंद्रे, औद्योगिक संशोधन आणि प्रशिक्षण केंद्रे, कृषी उत्पन्न बाजार केंद्रे, कृषी प्रक्रिया संशोधन आणि विकास केंद्र, ग्रामीण सबलीकरण केंद्र, सार्वजनिक गृह प्रकल्प, वैद्यकीय संशोधन केंद्र आणि अपघात उपचार केंद्र
पीएमआरडीएच्या औंध कार्यालयात महानगर आयुक्त तथा मुख्य कार्यकारी अधिकारी यांच्या नावाने लिखित स्वरूपात हरकती आणि सूचना देता येणार आहेत. यासोबतच pmr.dp.planning@gmail.com या ई-मेलवरही हरकती आणि सूचना पाठवता येतील. मुदतीनंतर आलेल्या सूचना आणि हरकती विचारात घेतल्या जाणार नाहीत.
पुणे महानगरपालिकेची हद्दवाढ करण्यात आली आहे. त्यामध्ये प्राधिकरण हद्दीतल्या २३ गावांचा समावेश करण्यात आला आहे. या गावांची प्रारूप विकास योजना तयार करण्यासाठी पुणे महानगर प्रदेश विकास प्राधिकरणाची नियुक्ती करण्यात आली आहे. 29 जुलै रोजी मुख्यमंत्र्यांच्या अध्यक्षतेखाली झालेल्या बैठकीत पीएमारडीएच्या प्रारूप आराखड्याला मंजुरी देण्यात आली होती. त्यानंतर 30 जून रोजी महापालिका हद्दीत समाविष्ट केलेल्या 23 गावांचे नियोजन प्राधिकरण म्हणूनही पीएमारडीएची नियुक्ती करण्यात आली होती.
संबंधित बातम्या :