संत तुकारामांच्या वंशजांकडून योगी आदित्यनाथ यांच्या ‘त्या’ वक्तव्याचा निषेध

रणजित जाधव, Tv9 प्रतिनिधी, पुणे | 12 फेब्रुवारी 2024 : “समर्थ रामदास स्वामी नव्हे तर जगद्गुरू संत तुकाराम महाराज छत्रपती शिवाजी महाराजांचे गुरू होते”, असा दावा प्रशांत महाराज मोरे देहूकर यांनी केलाय. ते संत तुकाराम महाराजांचे अकरावे वंशज आहेत. मुख्यमंत्री योगी आदित्यनाथ आणि गोविंदगिरी महाराजांनी रविवारी आळंदीत बोलताना समर्थ रामदास स्वामी हे छत्रपती शिवाजी महाराजांचे गुरू असल्याचा दावा केला होता. त्यांच्या दाव्यावर प्रशांत महाराज मोरे यांनी निषेध व्यक्त केला आहे.

प्रशांत महाराज मोरेंनी मुख्यमंत्री योगी आदित्यनाथ आणि गोविंदगिरी महाराजांची तीव्र निषेध केला. तसेच जगद्गुरू संत तुकाराम महाराज हे छत्रपती शिवाजी महाराजांचे गुरू होते, असा प्रतिदावा प्रशांत महाराज मोरेंनी केला. त्यांनी यासाठी एका अभंगाचा दाखला ही दिला. “प्रशांत महाराज मोरे देहूकरांची ही वैयक्तिक भूमिका आहे”, असं संत तुकाराम महाराजांच्या संस्थानकडून स्पष्ट करण्यात आलंय. मात्र देवस्थानने अद्याप त्यांची भूमिका अद्याप स्पष्ट केलेली नाही.

योगी आदित्यनाथ काय म्हणाले होते?

“महाराष्ट्रात एकाच कुटुंबात चार संत होऊन गेले. त्यांचा आशीर्वाद आपल्याला शेकडो वर्षांपासून मिळतो आहे. याच महाराष्ट्रात छत्रपती शिवाजी महाराज यांना रामदास स्वामी यांनी घडवलं. त्यांनी औरंगजेबच्या सत्तेला आव्हान दिले. औरंगजेबला असे मारले की आजपर्यंत औरंगजेबला कोणी विचारलं नाही. महाराष्ट्र ही शौर्य आणि पराक्रमाची भूमी आहे. कारण इथं संतांचं सान्निध्य आहे. याच महाराष्ट्रात येऊन आज सगळ्या संतांचं दर्शन मला घेता येत आहे आणि शिवरायाच्या पराक्रमाने पावन झालेली भूमी मला पाहता आली”, असं योगी आदित्यनाथ म्हणाले होते.