Bhor Crime: संताप, आक्रोश, हंबरडा…पुण्यात चिमुरडीची अत्याचार करून हत्या, आतापर्यंत घडलं काय?

Pune Bhor Narasapur Crime: पुण्यातील भोर तालुक्यातील नरसापूर येथे साडेतीन वर्षाच्या चिमुरडीवर अत्याचार करून तिची हत्या करण्यात आली. परवा ग्रामस्थांनी आरोपीला फाशी द्यावी, त्याला ताब्यात द्यावे या मागणीसाठी बेंगळुरू-पुणे महामार्ग रोखून धरला होता. तर काल आंदोलनाची धग पुण्यापर्यंत पोहचली. त्यातच पोलिसांनी पीडितेच्या वडिलांची कॉलर धरली आणि सौम्य लाठीचार्च केल्याने वातावरण तापले. पोलिसांनी आरोपीला अटक केली आहे. त्याला न्यायालयासमोर दाखल करण्यात आले. त्याला 7 मे पर्यंत पोलीस कोठडी सुनावण्यात आली आहे.

आमिष दाखवून नेले गोठ्यात  

65 वर्षीय आरोपी हा मजूरी करतो. त्याच्याविरोधात विनयभंगाचे गुन्हे दाखल आहेत. आरोपीने मुलीला जेवणाचे आमिष दाखवून गोठ्यात नेले. तिथे तिच्यावर अत्याचार केले. त्यानंतर तिची हत्या केली आणि शेणाखाली तिचा मृतदेह लपवला. 4 वाजले तरी मुलगी न आढळून आल्याने तिचा शोध सुरू झाला. नातेवाईकांनी घराशेजारील एक सीसीटीव्ही तपासला असता. त्यात आरोपी तिला घेऊन जाताना दिसला. आरोपी एका फाट्यावर असल्याचे समोर आले. गावकऱ्यांनी त्याच्याकडे चौकशी केल्यावर त्याने मृतदेह लपवल्याची जागा दाखवली. पोलिसांनी त्याला ताब्यात घेतले. त्याच्याविरोधात भारतीय दंड संहिता आणि लैंगिक गुन्ह्यांपासून मुलांचे संरक्षण (पॉक्सो) कायद्याच्या संबंधित तरतुदींनुसार गुन्हा दाखल करण्यात आला आहे.

मुंबई-बेंगळुरू महामार्ग जॅम

या घटनेनंतर संतापाची लाट उसळली. पुणे जिल्ह्यातील नागरिकांनी या गावाकडे धाव घेतली. पोलिस ठाण्याला घेराव घातला. आरोपीला ताब्यात द्या. त्याला फाशी द्या म्हणून मुंबई-बेंगळुरू महामार्गावर ठिय्या आंदोलन केले. साडेचार तासाहून अधिक काळ आंदोलन करण्यात आले. पोलिसांवर दबाव वाढला. पोलिसांनी चर्चेतून मार्ग काढण्याचा प्रयत्न केला. पण नागरिक ऐकण्याच्या मनस्थितीत नव्हते. त्यानंतर पोलिसांनी बळाचा वापर करत नातेवाईक आणि आंदोलनकर्त्यांना बाजूला केले आणि हा महामार्ग मोकळा केला. आंदोलनाची धग थेट पुण्यापर्यंत पोहचली.

पुण्याचे ग्रामीण पोलीस अधिक्षक संदीप गिल यांनी लोकांना आश्वासन दिले की आरोपीविरोधात 15 दिवसांच्या आत दोषारोपपत्र दाखल करण्यात येईल. याप्रकरणी आरोपीविरोधात फास्टट्रॅक कोर्टात खटला चालवण्यात येणार आहे. आरोपी हा गुन्हेगारी वृत्तीचा असून 1998 आणि 2015 मध्ये त्याच्याविरोधात विनयभंग आणि लैंगिक शोषणाचा गुन्हा दाखल करण्यात आला. आरोपी हा मजूर असून तो गावाच्या आसपास राहायचा.

भोरमध्ये कडकडीत बंद

नरसापूर येथील या घटनेच्या निषेधार्थ आज भोरमध्ये कडकडीत बंदचे आवाहन केले आहे. सकाळपासूनच व्यावसायिकांनी घटनेच्या निषेधार्थ दुकानं बंद ठेवली आहे. आरोपीला तातडीने कडक शासन करण्याची मागणी जोर धरत आहे. तर आरोपीचा एन्काऊंटर करण्याची मागणीही आता काहीजण करत आहे. पोलिसांवर सर्वच बाजूने दबाव वाढला आहे.