कलयुग यालाच म्हणतात, आईने आपल्या इवल्याशा बाळाला विकलं, किंमत ऐकून आणखी धक्का बसेल

Image Credit source: tv9

सागर सुरवसे, सोलापूर : सोलापूर शहरातून धक्कादायक बातमी आली आहे. या बातमीनंतर कलयुग यालाचा म्हणतात का? या प्रश्नाचे उत्तर मिळाले आहे. अनेक जण आपल्याला मुल व्हावे यासाठी नवस फेडतात, वैद्यकीय उपचार करतात. परंतु दुसरीकडे स्वत:चे मुल विकणारे महाभाग अधूनमधून सापडत असतात. आता फक्त १८ दिवसांच्या बाळाची विक्री त्याच्या आई-बापानेच केल्याचा प्रकार उघड झाला आहे. या प्रकरणी पोलिसांनी दहा जणांवर गुन्हा दाखल केला आहे. बाळ दत्तक दिल्याचा खोटा बॉण्ड त्यांनी केल्याचे उघड झाले आहे.

काय घडला प्रकार

सोलापुरात 18 दिवसांच्या नवजात बाळाच्या विक्रीचा प्रकार उघड झाला आहे. या बालकाला 3 लाखांत विकल्याची धक्कादायक माहिती समोर आली. बाळाच्या जन्मदात्या आई-वडिलांनी आपल्या बाळाची विक्री केल्याचा प्रकार घडला. या प्रकरणासाठी मध्यस्थी करणाऱ्या महिलेने ८० हजार रुपये घेतल्याचे उघड झाले होते. दरम्यान या प्रकरणी एकूण १० जणांवर गुन्हा दाखल करण्यात आला आहे. सर्व आरोपींवर अल्पवयीन न्याय कायद्याअंतर्गत सदर बाजार पोलीस ठाण्यात हा गुन्हा दाखल करण्यात आलाय.

खोटा बाँड करुन बाळाची विक्री

ज्या आईने बाळास नऊ महिने सांभाळले, तिनेच जन्माच्या अवघ्या १८ व्या दिवशी बाळ विक्री केले. त्यांनी आपले बाळ दत्तक देत असल्याचा बाँड केला. मात्र हे बाळ कोणाला देणार याचा उल्लेख बाँडमध्ये केला नाही. पोलिसांनी घटनेचा तपास करताना आईनेच आरोपीला आपले बाळ तीन लाखात विकल्याचे निष्पन्न झाले. पोटाच्या गोळाला आईनेच विकल्यामुळे सर्वसामान्यांना धक्का बसला आहे.

प्रक्रिया बेकायदेशीर

बाळ दत्तक घेण्याची कायदेशीर प्रक्रिया आहे. ज्याला मूल दत्तक घ्यायचे आहे, त्याचे पॅन कार्ड. जन्म-प्रमाणपत्र किंवा जन्म तारखेचा पुरावा असलेली कागदपत्रं. ज्यांना मूल दत्तक घ्यायचं आहे, त्यांना कुठल्याही प्रकारचा गंभीर आजार नाही, याबाबतचं डॉक्टर अथवा पात्र अधिकाऱ्याचं प्रमाणपत्र. दाम्पत्य असल्यास दोघांची स्वतंत्र प्रमाणपत्रं जमा करावी. याबाबत मोठी प्रक्रिया आहे. ही प्रक्रिया न करता दुसऱ्याच एका महिलेला बेकायदेशीर रित्या बाळ दिले. तसेच बाळ दत्तक दिल्याचा खोटा बाँड केल्याचा प्रकार उघडकीस आला. आता पोलिसांनी या प्रकरणाशी संबंधित सर्व आरोपींवर गुन्हा दाखल केला आहे.