Pune rain : चेंबरमधला कचरा काढत पावसाच्या पाण्याला करून दिली वाट, वाहतूक पोलिसाचा व्हिडिओ व्हायरल
प्रशासनाकडून वेळेवर कार्यवाही होत नसल्याने नागरिका नाराजीही व्यक्त करत आहेत. अशावेळी प्रशासनाची वाट न पाहता वाहतूक पोलीस कर्मचारीच पाण्याचा वाट करून देताना दिसून आला.
अभिजीत पोते, पुणे : रस्त्यावरील चेंबरमध्ये अडकलेला कचरा काढून वाहतुकीची कोंडी दूर करतानाचा पोलीस कर्मचाऱ्याचा एक व्हिडिओ व्हायरल झाला आहे. काल पुण्यात मुसळधार पाऊस (Heavy rain) झाला. यावेळी ठिकठिकाणी पाणी साचले होते. अनेक ठिकाणचे चेंबर्स कचऱ्यामुळे बंद झाले होते. त्यामुळे रस्त्यांवर पाणीच पाणी आणि वाहनांची रांग असे चित्र पाहायला मिळाले. यात आता स्वत: वाहतूक पोलीस कर्मचाऱ्याने चेंबरमधील कचरा काढत वाहतूक मोकळी करण्याचा प्रयत्न केला. या घटनेचा व्हिडिओ सध्या मोठ्या प्रमाणात व्हायरल झाला आहे. विमाननगर (Viman nagar) चौक येथील हा व्हिडिओ आहे. यात वाहतूक पोलीस स्वतः चेंबरमध्ये अडकलेला कचरा काढून पाण्याला वाट करून देताना पाहायला मिळत आहे. पुणेकरांनी हा व्हिडिओ सोशल मीडियावर टाकत आणि व्हायरल करत (Viral) अशावेळी देखील पोलीसच कामाला येतात, असे म्हटले आहे.
प्रशासनाचे दुर्लक्ष?
पुण्यात काल मुसळधार पाऊस झाला. यामुळे जवळपास सर्वच रस्त्यांवर पाणी साचले होते. वाहतुकीला यामुळे अडथळा निर्माण झाला. काही परिसरात नागरिकांच्या घरात पाणी शिरले. आंबिल ओढा परिसरातील नागरिकांची तर मोठी गैरसोय यामुळे झाली आहे. पाऊस सुरू झाल्यावर आमच्या घरात दरवेळी पाणी येते. मात्र प्रशासन याकडे दुर्लक्ष करत असल्याचा स्थानिकांनी आरोप केला आहे. अद्यापही अनेक परिसरांत पाणी आहे. प्रशासनाकडून वेळेवर कार्यवाही होत नसल्याने नागरिका नाराजीही व्यक्त करत आहेत. अशावेळी प्रशासनाची वाट न पाहता वाहतूक पोलीस कर्मचारीच पाण्याचा वाट करून देताना दिसून आला.
पोलिसांचा व्हिडिओ व्हायरल
चौकांमध्ये मोठी गर्दी
पाऊस नेमका संध्याकाळच्या वेळी पडल्याने चौकांमध्ये मोठी गर्दी आणि कोंडी झालेली पाहायला मिळाली. त्यात अधिक भर पडू नये, म्हणून या कर्मचाऱ्यांने चंबरचे झाकण आणि त्याबाजूला असलेला कचरा स्व:च्या हाताने काढला. पाण्याचे प्रमाण अधिक असल्याने काहीसा वेळ पाणी निचरण्यास लागला. मात्र हे करत असतानाचा व्हिडिओ मात्र सर्वत्र व्हायरल झाला आहे. अशावेळी प्रशासन नाही, तर पोलीसच मदतीला येतात, अशी भावना व्यक्त होत आहे.
