गद्दार नव्हे हा तर सुपर गद्दार निघाला, उद्धव ठाकरे यांच्या बहिणीची टीका कुणावर?

पुणे : उद्धव ठाकरे यांची आतेबहीण कीर्ती पाठक यांनी विजय शिवतारे यांच्यावर जोरदार टीका केली. कीर्ती पाठक म्हणाल्या, मी टीव्हीवर बातमी बघत होते. आतापर्यंत आम्ही गद्दार, उद्दार असं आम्ही म्हणत होतो. पण, आज तर मी त्यांच्यातला सुपर गद्दार बघीतला. तो स्वतःच्या पापाची कबुली देत होता. तेही वा आपण काय ग्रेट काम केलं, अशा थाटात. कीर्ती पाठक यांनी सांगितलं की, तुम्ही सर्वांनी एक फेमस कादंबरी वाचली असेल. श्री. ना. पेंडसे यांची गारंबीचा बापू. कोकणातल्या एका गावातील प्रेमकहाणीची ही कथा होती. एका विधवेवर त्याचं प्रेम बसतं नि तिच्याशी लग्न करून बापू आयुष्याचं भलं करतो. सामाजिक भान जपणारी आणि सामाजिक क्रांती करणारी अशी ती एक कथा होती.

बापू म्हटलं की, गारंबीच्या बापूची आठवण येते. पण, आपल्याकडं एक निर्लज्ज पुरंदरचा बापू आहे. त्यानी आज स्वतःच्या पापाची कबुली दिली. खरं म्हणजे बापू या नावाला त्यांनी खूप सार्थ व्हायला पाहिजे होतं.

कारण बापू हा शब्द आपल्या डोक्यात अनेक अर्थानं येतो. गावाचा उद्धार केला तो बापू. महिलेचा उद्धार करणारा सन्मान करणारा असा गारंबीचा बापू. आणि या बापूनं घरच्या महिलेला फसविलं. आणखी तीन बायका केल्या, असा हा पुरंदरचा बापू, अशी घणाघाती टीका कीर्ती पाठक यांनी केली.

गद्दारीची बीज एकनाथ शिंदे यांच्या मनात रोवली. असं खुलेआम सांगतो नि पापाची कबुली देतोय. काय म्हणावं या गद्दाराला. या पुरंदरच्या बापूला निवडणुकीमध्ये गाडल्याशिवाय स्वस्त बसू नका. हा बापू घातक आहे. याला गाडलाचं पाहिजे, असा इशाराही कीर्ती पाठक यांनी दिला.