हॉटेलमध्ये घुसून मारू… दोघे ताब्यात, जरांगेंना भेटण्यापूर्वीच प्रसाद लाड यांना धमकीचा फोन; मोठी खळबळ

ज्ञानेश्वर लोंढे, टीव्ही9 प्रतिनिधी, छत्रपती संभाजी नगर : भाजप नेते आणि आमदार प्रसाद लाड यांना छत्रपती संभाजीनगर मध्ये दोघांनी फोनवरून धमकी दिली. मनोज जरांगे पाटील यांच्या भेटीसाठी प्रसाद लाड रात्रीपासूनच छत्रपती संभाजीनगरमध्ये मुक्कामी आहेत. त्यावेळी त्यांना धमकीचे दोन ते तीन कॉल आले. हॉटेलमध्ये घुसून मारू अशी धमकी त्यांना देण्यात आली. त्यामुळे एकच खळबळ उडाली. पोलिसांनी तातडीने तपासाची चक्र फिरवली आणि दोन तरुणांना अटक केली. आज सकाळीच प्रसाद लाडे हे अंतरवाली सराटीकडे रवाना झाले. ते थोड्याच वेळात मनोज जरांगे यांच्याशी चर्चा करतील. या भेटीकडे सर्वांचे लक्ष लागले आहे. सरकारने मनोज जरांगे यांच्याशी चर्चा सुरू केल्याचे मानले जात आहे.

हॉटेलमध्ये घुसून हल्ला करतो

छत्रपती संभाजीनगरमध्ये मुक्कामी असताना काल रात्री प्रसाद लाड यांना धमकी देण्यात आली. हॉटेलमध्ये घुसून मारण्याची धमकी देण्यात आली. हॉटेलमध्ये घुसून हल्ला करतो गाडीवर हल्ला करतो अशा प्रकारची धमकी दोघांनी दिली. आंदोलन सुरू असताना तुम्ही मनोज जरांगे पाटलांवर टीका करत होते आता कशी भेट घेताय असं म्हणत ही धमकी देण्यात आली. पोलिसांनी तपासाची चक्र फिरवून योगेश शितोळे पाटील व गणेश उगले यांना ताब्यात घेत अटक केली. या दोघांनी धमकी दिल्याचे समोर आले आहे. प्रसाद लाड थांबलेल्या हॉटेल रामा इंटरनॅशनलमध्ये पोलिसांनी मोठा बंदोबस्त ठेवला आहे.

शंकाचं निरसन करणार

या संपूर्ण घटनाक्रमावर भाजप नेते प्रसाद लाड यांनी प्रतिक्रिया दिली. उदय सामंत यांचं जरांगेंशी चांगलं असल्याचे ते म्हणाले. त्यामुळे सरकारची कोणती भूमिका असेल तर अशावेळी उदय सामंत जातात. त्यांच्या भेटीत काही झालं नाही असा माझा अजिबात आरोप नाही, असे ते म्हणाले. तर धमकी प्रकरणावरही त्यांनी मनमोकळं केले. धमकी देणार्‍या तरुणांना पोलिसांनी अटक केली आहे. माझ्याबाबतीत त्यांना काही शंका, त्यांच्या शंकांचं निरसन करु. पोलिसांना त्या तरुणांविरोधात कडक कारवाई न करण्याचे सांगणार असल्याचे त्यांनी सांगितले. तर मनोज जरांगेंच्या भेटीला त्यांच्या विनंतीनंतर आलो असल्याची माहिती त्यांनी दिली.