भोंदू बाबा अशोक खरात प्रकरणी सुषमा अंधारेंचे ट्वीट, म्हणाल्या चाकणकर ताईंच्या…

महाराष्ट्रात सध्या भोंदू बाबा अशोक खरातचे प्रकरण चांगलेच गाजत आहे. या प्रकरणी सध्या अनेक राजकीय आरोप-प्रत्यारोप होताना दिसत आहेत. त्यातच आता ठाकरे गटाच्या नेत्या सुषमा अंधारे यांनी राष्ट्रवादी काँग्रेस अजित पवार गटाच्या नेत्या रुपाली चाकणकर आणि प्रदेशाध्यक्ष सुनील तटकरे यांच्यावर बोचरी टीका केली आहे. रुपाली चाकणकर यांच्या बोटाला झालेली जखम आणि सुनील तटकरे यांच्या बोटाला झालेल्या जखमेवरुन सुषमा अंधारेंनी निशाणा साधला आहे. सुषमा अंधारे यांनी हा किती मोठा योगायोग असा टोला लगावला आहे.

नेमकं प्रकरण काय?

अध्यात्म आणि तंत्र-मंत्राच्या नावाखाली महिलांचे लैंगिक शोषण आणि भाविकांची आर्थिक लूट करणाऱ्या अशोक खरातचे काळे कारनामे उघड झाले आहेत. या भोंदू बाबाचे अनेक बड्या नेत्यांशी संबंध असल्याचे बोलले जात आहे. त्यातच रुपाली चाकणकर या अशोक खरातला गुरु मानत असल्याचा आरोप झाल्यानंतर वादाला आणखी पेव फुटले. यानंतर रुपाली चाकणकर यांच्या तर्जनीच्या बोटाला जखम झाल्याचे फोटो समोर आले होते. तशाचप्रकारे सुनील तटकरे यांचेही फोटो व्हायरल झाले होते. यावरुन सुषमा अंधारे यांनी तर थेट चाकणकर या तंत्र-मंत्र विद्या करायच्या असा आरोप चाकणकरांवर केला होता.

सुषमा अंधारे काय म्हणाल्या?

आता यावर सुषमा अंधारे यांनी एक ट्वीट केले आहे. त्यात त्यांनी एक व्हिडीओ पोस्ट केला आहे. याद्वारे त्यांनी जोरदार टीका केली आहे. अध्यक्षपदावरुन पायउतार झाल्यानंतर रुपाली चाकणकरांना तब्बल ४ दिवसांनी नेमकं त्यांच्या अनामिकेला काय झालं होतं, त्याचं कारण आता सुचलेले आहे. त्यांचं व्हॉटसअॅप स्टेटस आणि बातम्या या सर्व गोष्टींवरुन जाणवतंय की म्हणे त्यांच्या अनामिकेला दरवाज्यात अडकल्याने जखम झाली. साधारण दरवाज्यात माणसाचा अंगठा, तर्जन किंवा करंगळी अडकू शकते. मला जेवढं काही त्याच्यातलं कळत त्यानुसार…, असे सुषमा अंधारे म्हणाल्या.

पण काय योगायोग की चाकणकरांच्या अनामिकेला दरवाजामुळे जखम झाली. आताच राष्ट्रवादी काँग्रेसचे प्रदेशाध्यक्ष सुनील तटकरे यांनी पत्रकार परिषद घेतली. त्यांनी सांगितलं की त्यांच्या तर्जनीला सुद्धा दरवाज्यात अडकल्यामुळेच जखम झाली. एकूण काय, हातातले गंडेदोरे काय, ईशान्यश्वराची पूजा काय, बोटाला होणारी जखम काय आणि नेमकी ती जखम दरवाजात अडकून होते, हा सर्वच किती योगायोग आहे. कमाल आहे, असा टोलाही सुषमा अंधारेंनी लगावला.

चाकणकरांचा कार्यकर्ता सांगत आहे की ताईंच्या दरवाज्यात बोट अडकून जखम झाली. ताई आमच्याकडे त्यादिवशी आरतीला आल्या होत्या पण काय गंमत आहे की चाकणकर स्वतः सांगतात दोन तारखेला त्या अजितदादांच्या दौऱ्यामध्ये होत्या काय खरं काय खोटं ईशान्येश्वराला आणि खरातांनाच माहिती.. पण हा किती मोठा योगायोग आहे की तटकरेंच्या बोटाला झालेली जखम सुद्धा दरवाजात अडकूनच झाली, असेही सुषमा अंधारेंनी ट्वीट करताना म्हटले आहे. त्यामुळे आता याप्रकरणी विविध चर्चांना उधाण आले आहे.