दे धपाधप… लग्नाला आले अन् एकमेकांच्या बोकांडी बसले, नवरदेवाचा बूट आणि नवरीची चप्पल लपवल्याने तुफान राडा; Video Viral

लग्न म्हटलं की आनंदाचा क्षण, सगळेजण नटून थटून विवाह सोहळ्याला हजेरी लावतात. लग्नांमुळे नाती गोती वाढत जातात. भारतात लग्नाच्या वेगवेगळ्या परंपरा आढळतात. महाराष्ट्रातही वेगवेगळ्या भागात वेगवेगळ्या प्रथा आहेत. एकंदरीतच लग्नात लहानांपासून थोरांपर्यंत सर्वच मजा करतात. मात्र आता जालन्यातील एका लग्नाची चर्चा संपूर्ण राज्यात होत आहे. नवरदेवाचा बूट आणि नवरीची चप्पल लपवल्याने लग्न मंडपात राडा वधू-वर पक्षात हाणामारी झाली आहे. 3 तारखेला ही घटना घडल्याचे समोर आले आहे. जालन्यातील अंबड तालुक्यातील नांदी गावात ही घटना घडली आहे. या घटनेचा व्हिडिओ सोशल मीडियावर मोठ्या प्रमाणात व्हायरल झाला आहे. याबाबत सविस्तर माहिती जाणून घेऊयात.

लग्नात तुफान हाणामारी

लग्नात नवरदेवाचा बूट आणि नवरीची चप्पल लपवल्याने झालेल्या वादाच रुपांतर हाणामारीत झाल्याचा प्रकार समोर आला आहे. जालना जिल्ह्यातील अंबड तालुक्यातल्या नांदी गावात 3 तारखेला लग्न पार पडले. या लग्नात नवरदेवाचा बूट नवरीकडील लोकांनी लपवला तर नवरीचां चप्पल नवरदेवाच्या भावाने लपवा असता नवरीच्या काकाने नवरदेवाच्या भावास ठोसा मारला. यातून दोघात वाद झाल्याने दोन्ही बाजूचे वऱ्हाड एकमेकांवर तुटून पडले.

सोन्याचे दागिने गेले चोरीला

या घटनेमुळे दोन्ही बाजूच्या मंडळींमध्ये प्रचंड वाद उफाळून आला यात नवरदेवाने हस्तक्षेप केला, मात्र या राड्यात त्याचेही कुणी ऐकले नाही. या प्रकरणी वधू कडील ज्ञात आणि अज्ञात 14 जणांवर अंबड पोलिस ठाण्यात गुन्हा दाखल करण्यात आला आहे. तर नवरदेवाकडील 7 आणि 15 ग्रॅम चे सोन्याचे दागिने देखील चोरीला गेल्याची तक्रार दाखल करण्यात आली आहे. पोलिसांनी या घटनेचा तपास सुरू केला आहे.

व्हिडिओ सोशल मीडियावर तुफान व्हायरल

समोर आलेल्या व्हिडिओमध्ये दोन्ही बाजूचे वऱ्हाडी एकमेकांना मारहाण करत आहेत. यात महिलांचाही समावेश आहे. अनेक महिला एकमेकींना मारत आहेत. तसेच पुरुषही आक्रमक होत एकमेकांना ठोसे मारताना पहायला मिळत आहे. किरकोळ कारणामुळे झालेल्या या भांडणाची चर्चा आता संपूर्ण राज्यात होताना दिसत आहे.