बारामतीत पुन्हा पवार विरुद्ध पवार? युगेंद्र पवारांची मोठी घोषणा

बारामतील सोमेश्वर साखर कारखाना निवडणुकीसाठी पक्षांनी तयारी सुरू केली आहे. दोन्ही राष्ट्रवादीमध्ये मोठ्या हालचाली सुरू झाल्या आहेत. यातच आता युगेंद्र पवारांनी मोठी घोषणा केली आहे. एकीकडे राष्ट्रवादीच्या विलीनीकरणाच्या चर्चा सुरू आहेत. अशातच दुसरीकडे युगेंद्र पवारांनी मोठी घोषणा करत स्वबळाचा नारा दिला आहे.

बारामती तालुक्यातील श्री सोमेश्वर सहकारी साखर कारखान्याच्या पंचवार्षिक निवडणुकीसाठी राष्ट्रवादी काँग्रेस शरदचंद्र पवार पक्षाने स्वतंत्र 21 जागा लढवण्याचा निर्णय घेतला आहे. सोमेश्वर शेतकरी विकास पॅनलची घोषणा युवा नेते युगेंद्र पवार यांनी केली आहे. या निवडणुकीत शरदचंद्र पवार पक्षाकडून देखील पॅनेल देण्यात आलं आहे.

यावेळी बोलताना युगेंद्र पवार म्हणाले की, आमचं पॅनल पवार साहेबांच्या पक्षाचं पुरस्कृत पॅनल आहे. सोमेश्वर शेतकरी विकास पॅनल हे आमच्या पॅनलचं नाव आहे. आम्ही सर्वच्या सर्व जागा लढवणार आहोत. अगोदर जी आमची भूमिका होती तीच आता आहे. वेगळं काही करत नाही. सुरुवातीला आम्ही स्थिर होतो आताही आम्ही स्थिर आहोत आणि चांगले तगडे उमेदवार आमच्या पॅनल मध्ये आहेत, असं त्यांनी सांगितलं आहे.

ते म्हणाले की, उद्या सकाळी नऊ-साडेनऊ वाजता आमची अधिकृत यादी जाहीर करणार आहोत. पुरंदरमधील राष्ट्रवादी शरद पवार गटाच्या दोन नेत्यांचा पुरुषोत्तम जगताप यांच्या पॅनलला पाठिंबा आहे. यावर युगेंद्र पवारांनी सांगितलं की, त्यांनी पाठिंबा दिलेला नाही. आम्हीच त्यांना तिथे पाठवलं. ते तिथे चर्चा करत होते. आपण सर्वांशी चर्चा करू शकतो, तिथं जाणं ही चुकीचं किंवा गैर नाही ते मला सांगून गेले आहेत, अशी प्रतिक्रिया युगेंद्र पवारांनी दिली आहे.