अखेर काश्मीरच्या जंगलात सापडले बेपत्ता असलेल्या दोन पोलिसांचे मृतदेह, दहशतवाद्यांकडून अक्षरश: मृतदेहांची चाळण

किश्तवाडमध्ये बेपत्ता पोलिसांचे मृतदेह सापडले, दहशतवाद्यांशी धुमश्चक्रीनंतर सुरू होता शोध

Jammu And Kashmir Terror Attack: जम्मू आणि काश्मीरच्या किश्तवाड जिल्ह्यात बेपत्ता झालेल्या दोन विशेष पोलीस अधिकाऱ्यांचा (SPO) मृतदेह गुरुवारी सापडले. बुधवारी मारवाह जवळील देहरना जंगलात स्थानिकांनी गोळीबाराचा आवाज ऐकला होता. या भागातही दहशतवाद्यांशी चकमक उडाल्याचे समोर आले. या धुमश्चक्रीनंतर दोन्ही पोलीस अधिकाऱ्यांचा मोबाईल बंद येत होता. त्यानंतर या जंगलात व्यापक शोध मोहिम हाती घेण्यात आली. दहशतवादी या परिसरात लपल्याचे समोर आल्यानंतर सुरक्षा दल सतर्क झाले आहे.

गोळीबाराच्या घटनेनंतर दोघेही बेपत्ता

प्राप्त माहितीनुसार, दोन्ही जवानांची ओळख पटली आहे. रशपाल कुमार(40) आणि बॉबी चंद (54) असे शहीद झालेल्या जवानांची नावं आहेत. ते स्पेशल ऑपरेशन्स ग्रुपचे (SOG) सदस्य होते. 11 नोव्हेंबर रोजी दुपारी दोन्ही जवान हे टेहाळणी आणि निगारणी करत होते. दोघेही या परिसरात गस्तीवर होते. ते त्यांच्या पोस्टवर जात होते. तेव्हाच त्यांचा संपर्क तुटला. त्यापूर्वी दुपारी जवळपास 3:30 वाजता या परिसरात गोळीबाराचा आवाज स्थानिकांनी ऐकला होता.

जम्मू आणि काश्मीरमधील किश्तवाड जिल्ह्यातील दुर्गम दच्छन भागात बुधवारी ही घटना घडली. या भागात पोलीस अधिकारी बेपत्ता झाले होते. हे दोघे कियार या गावातील त्यांच्या कॅम्पमधून मरवाह या लष्कराच्या चौकीकडे जात होते. पण त्या कॅम्पपर्यंत पोहचण्यापूर्वीच ते बेपत्ता झाले होते. त्यांचे मोबाइलही बंद होते. स्थानिक लोकांनी या भागात गोळीबाराचा आवाज ऐकला. त्यानंतर पोलीस आणि लष्कराच्या राष्ट्रीय रायफल्सने संयुक्त रूपाने शोध मोहीम राबवली.

2026 मध्ये चार दहशतवादी ठार

किश्तवाड जिल्ह्यातील अतिदुर्गम भागात आणि जंगल परिसरात दहशतवादी लपल्याचे समोर आले होते. त्यानंतर सुरक्षा दलाने या परिसरात सातत्याने सर्च ऑपरेशन राबवले आहे. उपलब्ध आकडेवारीनुसार, वर्ष 2026 मधील चकमकीत या परिसरात चार दहशतवादी ठार झाले तर एक जवान शहीद झाला होता. वर्ष 2025 मध्ये तीन दहशतवादी मारल्या गेले होते. तर एक जवान शहीद झाला होता. 2024 मध्ये तीन सुरक्षा कर्मचारी आणि दोन नागरिकांना प्राण गमवावा लागला होता.