विरोधकांच्या आरोपांनंतर आता NDAतील मित्रपक्षाचाही सवाल; ज्ञानेश कुमारांचा बचाव करण्यास केंद्रीय मंत्र्‍यांचा नकार

सध्या निवडणूक आयोग वादात अडकलं आहे. यामुळे आता आयोगावर अनेक प्रश्न उपस्थित झाले आहेत. तर केंद्रीय मंत्रीही ज्ञानेश कुमार यांचा बचाव करण्यास स्पष्टपणे नकार देत आहे. निवडणूक आयोगाभोवती सुरू असलेल्या वादाच्या पार्श्वभूमीवर केंद्रीय मंत्री आणि भाजपचा मित्रपक्ष असलेल्या लोक जनशक्ती पक्षाचे (एलजेपी) नेते चिराग पासवान यांनी चिंता व्यक्त केली आहे. यावर त्यांनी मोठे वक्तव्य केले आहे.

यावर बोलताना चिराग पासवान म्हणाले की, जर निवडणूक आयोगावर वारंवार प्रश्न उपस्थित केले जात असतील, तर त्यांची उत्तरे देण्याची जबाबदारी स्वतः निवडणूक आयोगाची आहे. एक राजकीय पक्ष म्हणून ते एका स्वतंत्र घटनात्मक संस्थेचे समर्थन करू शकत नाहीत. त्यांच्या मते, निवडणूक आयोगामध्ये काय चालले आहे याची त्यांना काहीही माहिती नाही. त्यामुळे जर आयोगावर प्रश्नचिन्ह उपस्थित केले जात असेल, तर मुख्य निवडणूक आयुक्तांनी स्वतः पुढे येऊन परिस्थिती स्पष्ट केली पाहिजे, असं त्यांनी सांगितलं आहे.

चिराग पासवान म्हणाले की, विरोधी पक्षांच्या आरोपांची त्यांना चिंता नाही. त्यांची चिंता ही आहे की, जर निवडणूक आयोगावर एकापाठोपाठ एक प्रश्नचिन्ह उपस्थित केले जात असेल, तर आयोगाने स्वतःचा बचाव केला पाहिजे. एक राजकीय पक्ष म्हणून मी एका स्वतंत्र घटनात्मक संस्थेचा बचाव करू शकत नाही. निवडणूक आयोगाच्या अंतर्गत एकमत किंवा मतभेदांची माहिती नाही. ही माहिती केवळ मुख्य निवडणूक आयुक्तांकडेच असू शकते.

ते पुढे म्हणाले की, त्यामुळेच जर निवडणूक आयोगाबद्दल प्रश्न उपस्थित केले जात असतील, तर मुख्य निवडणूक आयुक्तांनी स्वतः पुढे येऊन त्यांची उत्तरे द्यावीत. निवडणूक आयोगाची संपूर्ण भूमिका स्पष्ट करावी. संपूर्ण निवडणूक प्रक्रियेबद्दल कोणत्याही सामान्य नागरिकाच्या मनात शंका राहू नये, ही त्यांची सर्वात मोठी चिंता आहे. हेच लोकशाहीचे सौंदर्य आहे. भारत ही जगातील सर्वात मोठी लोकशाही आहे आणि त्यात निवडणूक आयोग महत्त्वाची भूमिका बजावतो. त्यामुळे देशातील कोणत्याही नागरिकाच्या मनात त्याच्या कामकाजाबद्दल कोणतीही शंका राहणार नाही, हे सुनिश्चित करणे निवडणूक आयोगाची जबाबदारी आहे.

चिराग पासवान म्हणाले की, हे प्रश्न वारंवार उपस्थित केले जात असून विरोधी पक्ष आणि नेत्यांकडून ते वाढत्या जोरावर उपस्थित केले जात असल्याबद्दल त्यांना चिंता वाटत आहे. जर हे प्रश्न वारंवार उपस्थित केले जात असतील, तर निवडणूक आयोगाने पत्रकार परिषद घेऊन आपली भूमिका स्पष्ट करावी. आयोगाने यापूर्वीही निवेदने जारी केली होती, परंतु आता हे प्रकरण अधिकच चिघळले असल्याचे त्यांनी सांगितले आहे. निवडणूक आयोगामध्ये मतभेद असल्याच्या बातम्या खऱ्या असतील तर मुख्य निवडणूक आयुक्त ज्ञानेश कुमार यांनी राजीनामा द्यावा का, असे विचारले असता आपल्याला याबद्दल काहीच माहिती नाही. निवडणूक आयोगाच्या अंतर्गत बैठकांबद्दलही आपल्याला माहिती नसल्याचे त्यांनी पुढे सांगितले.