ईडीची TMC विरोधात मोठी कारवाई, पाच ठिकाणी छापेमारी; बँक खात्यांमधील 440 कोटी रुपये गोठवले
Enforcement Directorate Raid : ईडीने सुमारे 440 कोटी रुपये असणाऱ्या टीएमसीच्या एचडीएफसी बँक खात्यांची चौकशी सुरू केली असून ही खाती गोठवली आहेत. याबाबत सविस्तर माहिती जाणून घेऊयात.
अंमलबजावणी संचालनाल म्हणजेच ED ने पश्चिम बंगालच्या माजी मुख्यमंत्री ममता बॅनर्जी यांच्या तृणमूल काँग्रेस पक्षाशी संबंधित कथित आर्थिक व्यवहार प्रकरणात मोठी कारवाई केली आहे. ईडीने सुमारे 440 कोटी रुपये असणाऱ्या टीएमसीच्या एचडीएफसी बँक खात्यांची चौकशी सुरू केली असून ही खाती गोठवली आहेत. विधानसभा निवडणुकीनंतर समोर आलेल्या वादग्रस्त बँक खात्यांद्वारे कथित बेकायदेशीर आर्थिक व्यवहार, निधी गोळा करणे आणि पैशांची अफरातफर केल्याचा आरोप करण्यात आला होता, याच प्रकरणाची चौकशी करताना ही कारवाई करण्यात आली आहे.
ईडीच्या तपासात काय समोर आले?
ईडीच्या तपासाच्या कक्षेत केअरवेल समूहाच्या विमानवाहतूक क्षेत्रातील कंपन्या आहेत. ईडीच्या माहितीनुसार, एप्रिल 2023 ते जून 2026 या कालावधीत AITC च्या खात्यांतून सुमारे 160 कोटी रुपये केअरवेल एव्हिएशन इंडिया प्रायव्हेट लिमिटेड आणि त्याच्याशी संबंधित दुसऱ्या एका कंपनीला पाठवण्यात आले. त्यानंतर केअरवेल एव्हिएशन इंडिया प्रायव्हेट लिमिटेडने 2023 ते 2026 दरम्यान सुमारे 82.96 कोटी रुपये स्वतःच्या नव्याने स्थापन केलेल्या कंपनीकडे वर्ग केले आहे.
ईडीला छापेमारीदरम्यान आढळले की या निधीचा मोठा भाग एका कंपनीमार्फत एम्ब्रेअर लेगेसी 600 विमान आणि अगस्ता 109 एसपी हेलिकॉप्टर खरेदीसाठी वापरण्यात आला. ईडीच्या म्हणण्यानुसार, या दोन्ही खरेदींसाठी सुमारे 112 कोटी रुपये खर्च करण्यात आले. हेलिकॉप्टर खरेदीसाठी काही परदेशी निधीचाही वापर करण्यात आल्याचा दावा तपास यंत्रणेने केला आहे, मात्र बहुतांश रक्कम थेट AITC च्या खात्यांतून आल्याचे समोर आले आहे.
ईडीने काय म्हटलं?
ईडीच्या म्हणण्यानुसार, विमान आणि हेलिकॉप्टर खरेदी केल्यानंतर ते भाडेतत्त्वावर पुन्हा AITCलाच देण्यात आले. त्याबदल्यात विमानांच्या वापरासाठी मोठ्या प्रमाणात पैसे देण्यात करण्यात आले. प्रथमदर्शनी हा संपूर्ण आर्थिक व्यवहार संशयास्पद वाटत असून, या पैशांचा प्रत्यक्ष वापर कोणत्या उद्देशासाठी करण्यात आला याबाबत तपास सुरू असल्याचे तपास अधिकाऱ्यांनी म्हटले आहे.
बंगालमध्ये राजकीय वाद
ईडीच्या या कारवाईनंतर पश्चिम बंगालचे राजकारण तापले आहे. टीएमसीने ही कारवाई सूडबुद्धीने केल्याचा आरोप केला असून, भाजपने मात्र भ्रष्टाचाराविरोधातील कारवाई म्हणत कारवाईचे समर्थन केले आहे. या कंपनीने यापूर्वी टीएमसीच्या वरिष्ठ नेते ममता बॅनर्जी आणि अभिषेक बॅनर्जी यांचाही समावेश असल्याचे म्हटले होते. तपास यंत्रणा आता या आर्थिक व्यवहारांचा आणि निधीच्या स्रोतांचा सखोल तपास करत आहे.
