मोहन भागवत यांनी लंडनच्या ऐतिहासिक गुरुद्वारात टेकला माथा; खालसा जत्थाचा इतिहास घ्या जाणून
मोहन भागवतांनी भारताबाहेरील सर्वात जुन्या गुरुद्वार्‍याला भेट दिली. त्यांनी ब्रिटिश शीख समुदायाशी संवाद साधला. या गुरुद्वार्‍याचे नाव ‘खालसा जत्था ब्रिटिश आयल्स गुरुद्वारा साहिब’ आहे.
राष्ट्रीय स्वयंसेवक संघा(आरएसएस) चे प्रमुख मोहन भागवत यांनी लंडनमध्ये ब्रिटिश शीख समुदायाशी चर्चा केली. ते भारताबाहेर बांधलेल्या सर्वात जुन्या गुरुद्वार्‍यांपैकी एका गुरुद्वार्‍यात पोहोचले. भागवत अमेरिका आणि कॅनडानंतर आपल्या परदेश दौऱ्याच्या शेवटच्या टप्प्यात युकेत पोहोचले आहेत. या आठवड्याच्या सुरुवातीला त्यांनी लंडनच्या ऐतिहासिक खालसा जत्था ब्रिटिश आयल्स गुरुद्वारा साहिबला भेट दिली. ही गुरुद्वारा १९०८ मध्ये स्थापन करण्यात आली होती.
राज्यसभा खासदार विक्रमजीत सिंह साहनी यांनी सांगितले की, मोहन भागवतांनी लंडनच्या विल्सडेन येथील श्री स्वामीनारायण मंदिरालाही भेट दिली. तिथे त्यावेळी जन्माष्टमीचा उत्सव साजरा केला जात होता. साहनी म्हणाले, “मोहन भागवतांनी कडा प्रसाद ग्रहण केला आणि गुरुद्वारा व्यवस्थापनासोबत सार्थक चर्चा केली. शीख परंपरेनुसार, गुरु दरबारात जो कोणी ‘पूर्ण नम्रतेने प्रार्थना करण्यासाठी आणि गुरुचा आशीर्वाद घेण्यासाठी’ येतो, त्या सर्वांचे स्वागत आहे.” रविवारी नंतर भागवतांनी लंडनच्या एका कम्युनिटी सेंटरमध्ये ‘सेलिब्रेशन ऑफ वननेस’ (एकतेचा उत्सव) या विषयावर आयोजित केलेल्या आपल्या युके दौऱ्यातील सर्वात मोठ्या जनसभेलाही संबोधित केले.
युरोपमधील पहिला गुरुद्वारा
‘खालसा जत्था ब्रिटिश आयल्स’ ची सुरुवात २०व्या शतकाच्या सुरुवातीला झाली होती. हा तो काळ होता जेव्हा शीख प्रवासी प्रथमच ब्रिटिश आयल्समध्ये येऊन स्थायिक झाले होते. त्यांच्यासाठी ही नवी जागा होती. त्यामुळे राहण्याच्या आव्हानांनाही सामोरे जावे लागले. या आव्हानांना तोंड देत त्यांनी अशी एक आध्यात्मिक जागा निर्माण करण्याचा प्रयत्न केला, जिथे ते आपल्या धर्म आणि संस्कृतीशी जोडले जाऊ शकतील. १९०८ मध्ये त्यांचे स्वप्न साकार झाले. तेव्हा लंडनच्या मध्यभागी या गुरुद्वार्‍याची स्थापना झाली. त्यानंतर हा युरोपमधील पहिला गुरुद्वारा बनला.
‘एकतेसाठी एकरूपता आवश्यक नाही’
आरएसएस प्रमुख मोहन भागवतांनी लंडनमध्ये भारतीय वंशाच्या लोकांना संबोधित करताना म्हटले की, “हिंदू राष्ट्र” ही संकल्पना धर्म, पूजापद्धती किंवा जीवनशैलीवर आधारित नसून विविधतेला स्वीकारण्यावर आधारित आहे. त्यांनी म्हटले की, “एकतेसाठी एकरूपता आवश्यक नाही.”
भागवतांचा लंडन दौरा आरएसएसच्या शताब्दी वर्षाच्या जागतिक संपर्क अभियानाचा भाग आहे. या माध्यमातून संघ जगभरातील आपले संबंध अधिक मजबूत करू इच्छितो आणि आपल्या संघटना व कार्याबद्दल “योग्य” दृष्टिकोन मांडू इच्छितो. यापूर्वी भागवतांनी न्यूयॉर्क आणि टोरंटोमध्येही असेच कार्यक्रम केले आहेत.
