नाशिकचे सुपुत्र सहाय्यक कमांडर नितीन भालेराव यांना वीरमरण, छत्तीसगडमध्ये नक्षल्यांनी घडवलेल्या IED स्फोटात 10 जवान जखमी

छत्तीसगडमधील ताडमेटला परिसरात नक्षलवाद्यांनी रात्री 2 IED स्फोट घडवून आणले. या स्फोटात कोबरा 206 बटालियनचे सहाय्यक कामांडर नितीन भालेराव यांना वीरमरण आलं.

sagar joshi | Updated on: Nov 29, 2020 | 10:33 AM

नाशिक: छत्तीसगडमध्ये सुकमा जिल्ह्यात नक्षलवाद्यांनी घडवून आलेल्या IED स्फोटात नाशिकचे सुपुत्र सहाय्यक कामांडर नितीन भालेराव शहीद झाले आहेत. या स्फोटात एकूण 10 जवान जखमी झाले आहेत. त्यात 4 जवानांची प्रकृती गंभीर असल्याची माहिती मिळतेय. सर्व जखमींना रात्री एअरलिफ्ट करण्यात आलं आहे. शहीद नितीन भालेराव हे नाशिकचे सुपुत्र आहेत. नाशिकच्या राजीव नगर भागात त्यांचे कुटुंबीय वास्तव्याला आहे. (Nashik CRPF jawan Nitin Bhalerao martyred in Naxal blast)

ताडमेटला परिसरात नक्षलवाद्यांनी रात्री 2 IED स्फोट घडवून आणले. या स्फोटात कोबरा 206 बटालियनचे सहाय्यक कामांडर नितीन भालेराव यांच्यासह 1 अधिकारी आणि 8 जवान जखमी झाले. नितीन भालेराव यांनी अत्यंत गंभीर स्थितीत रुग्णालयात दाखल करण्यात आलं. मात्र, उपचारादरम्यान त्यांनी अखेरचा श्वास घेतला. तर अन्य 9 जवानांवर उपचार सुरु असल्याची माहिती प्रशासनाकडून देण्यात आली आहे.

Total 10 personnel were injured & one died in an IED blast in Sukma, Chhattisgarh last night.

8 injured personnel were heli lifted to Raipur in the midnight for further treatment. Two injured are being treated at CRPF Hospital, Chintalnar: CRPF

— ANI (@ANI) November 29, 2020

नाशिक जिल्हाधिकाऱ्यांकडून शहीद भालेराव यांना श्रद्धांजली

नाशिकचे सुपुत्र सहाय्यक कामांडर नितीन भालेराव हे छट्टीसगडमध्ये शहीद झाले आहेत. त्यांच्या कंपनी कमांडरशी आपलं बोलणं झाल्याची माहिती नाशिकचे जिल्हाधिकारी सुरज मांढरे यांनी दिली. शहीद नितीन भालेराव यांचं पार्थीव रायपूरवरुन विमानाने मुंबईत आणलं जाईल. तिथून ते नाशिकला येईल. त्यानंतर नातेवाईक यांनी निश्चित केलेल्या वेळेनुसार त्यांच्यावर लष्करी इतमामात अंत्यसंस्कार केले जातील अशी माहितीही जिल्हाधिकाऱ्यांनी दिली. देशासाठी बलिदान देणाऱ्या नाशिकच्या वीर योद्ध्याला मन:पूर्वक श्रद्धांजली, अशा शब्दात जिल्हाधिकाऱ्यांनी शहीद नितीन भालेराव यांना आदरांजली वाहिली.