FSR ग्लोबलच्या एक्झिक्युटिव्ह डायरेक्टर श्वेता रवी कुमार यांची एनर्जी इन्स्टिट्यूटच्या फेलो म्हणून निवड

हैदराबादच्या श्वेता रवी कुमार, ज्या FSR Global च्या एक्झिक्युटिव्ह डायरेक्टर असून भारत सरकारच्या ऊर्जा मंत्रालयाच्या इंडिया एनर्जी स्टॅक (IES) या डिजिटल पब्लिक इन्फ्रास्ट्रक्चर प्रकल्पाच्या प्रोग्राम डायरेक्टर आणि राष्ट्रीय टास्क फोर्सच्या सदस्य आहेत, त्यांची प्रतिष्ठित एनर्जी इन्स्टिट्यूटच्या फेलो म्हणून ‘Eminence Route’ अंतर्गत निवड करण्यात आली आहे.

श्वेता रवी कुमार यांनी लिंक्डइनवरील पोस्टमध्ये लिहिले, ‘मला अत्यंत आनंद होत आहे की माझी एनर्जी इन्स्टिट्यूटच्या Fellow म्हणून Eminence Route अंतर्गत निवड झाली आहे. ही जबाबदारी मी केवळ वैयक्तिक सन्मान म्हणून पाहत नाही, तर ऊर्जा क्षेत्रात सुरू असलेल्या डिजिटलायझेशन, डी-सेंट्रलायझेशन, लवचिकता, AI आणि नवीन पायाभूत नियोजनाच्या बदलांच्या काळात जागतिक ऊर्जा चर्चेत अधिक सक्रिय योगदान देण्याची जबाबदारी म्हणून पाहते.”

श्वेता यांनी पुढे सांगितले की, FSR ग्लोबलचे बहुतांश काम हे सुधारणा प्रक्रियेच्या व्यावहारिक रचनेवर आधारित आहे. यामध्ये प्रशासन व्यवस्था, बाजार रचना, डेटा सिस्टिम, इंटरऑपरेबिलिटी, क्षमता विकास आणि प्रूफ-ऑफ-कॉन्सेप्ट पायलट्स यांचा समावेश आहे. FSR ग्लोबलचे मुख्य लक्ष ग्लोबल साऊथमधील ऊर्जा संक्रमणासाठी प्रभावी आणि अमलात आणता येणारे नियमन तयार करण्यावर आहे.

आपल्या पोस्टमध्ये त्या पुढे म्हणाल्या, ‘ऊर्जा संक्रमणाचा पुढचा टप्पा केवळ एका क्षेत्रापुरता मर्यादित राहणार नाही. वीज, गॅस, उष्णता, वाहतूक, डिजिटल पायाभूत सुविधा, ग्राहक आणि बाजार हे सर्व आता परस्परांशी जोडले जात आहेत. त्यामुळे नियामक संस्थांनाही ही बदलती वास्तवता स्वीकारावी लागेल.’

FSR ग्लोबलची सुरुवात इटलीतील फ्लॉरेन्स स्कूल ऑफ रेग्युलेशनची ‘सिस्टर संस्था’ म्हणून झाली होती. पंतप्रधान नरेंद्र मोदी यांनी दिलेल्या ‘आत्मनिर्भरता’च्या आवाहनाला प्रतिसाद म्हणून सल्लागार आणि धोरण क्षेत्रात स्वदेशी क्षमता निर्माण करण्याच्या उद्देशाने ही संस्था उभारण्यात आली होती. पुढे FSR ग्लोबल ही ग्लोबल साऊथवर लक्ष केंद्रित करणारी भारत-आधारित स्वतंत्र पॉलिसी थिंक-टँक म्हणून विकसित झाली असून ऊर्जा क्षेत्रातील धोरण आणि नियमन यामध्ये विशेष काम करत आहे.