अर्ध्या रात्री तिच्या घराचा दरवाजा उघडला अन्.., अरविंद केजरीवालांनी सांगितली सुनीता यांच्यासोबतची लव्हस्टोरी

आम आदमी पार्टीचे संस्थापक आणि दिल्लीचे माजी मुख्यमंत्री अरविंद केजरीवाल यांनी एका पॉडकास्ट मुलाखतीमध्ये बोलताना विविध विषयांवर चर्चा केली आहे. त्यांनी आपल्या खासगी आयुष्यातील देखील काही प्रसंग या मुलाखतीमध्ये सांगितले आहेत. तसेच देशात सध्या असलेल्या राजकीय परिस्थितीवर देखील त्यांनी भाष्य केलं आहे. तसेच मी जेव्हा इंजिनिअरिंग कॉलेजला होतो, तेव्हा माझ्यासोबत देखील रॅगिंग झालं होतं, असा गौप्यस्फोट देखील त्यांनी यावेळी केला आहे. त्यांनी असाच आपल्या आयुष्यातील एक प्रसंग यावेळी सांगितला.

जेव्हा मी इंजिनिअरिंगचा अभ्यास करत होतो तेव्हा मी घरी आल्यानंतर मला माझ्या आजोबांनी विचारलं तू नेमका कशाचा अभ्यास करत आहेस, तेव्हा मी सांगितलं की, मी मेकॅनिकल अभियांत्रिकीचा अभ्यास करत आहे, तेव्हा माझे आजोबा मला म्हणाले की पंखा खराब झाला आहे, तेवढा तो दुरूस्त करून दे, त्यावेळी मला माझ्या आजोबांच्या बोलण्यावर हसू आलं, जसं आज सध्या संपूर्ण जगभरात एआयचा डंका आहे, तसंच त्या काळात कम्प्युटरची चलती होती, लोकांना भीती वाटायची की कम्प्युटर आपल्या नोकऱ्या खाऊन टाकेल, असंही यावेळी केजरीवाल यांनी म्हटलं आहे.

तसेच त्यांनी यावेळी आपली लव्हस्टोरी देखील शेअर केली आहे. ‘आयआरएस इंडियन रेव्हेन्यू सर्व्हिस’ ट्रेनिंग वेळी माझी नागपुरात सुनीता यांच्यासोबत ओळख झाली होती. त्या माझ्या बॅचमेंट होत्या. एक दिवस मी अर्ध्यारात्री जाऊन सुनीता यांचा दरवाजा वाजवला, त्यांनी जेव्हा दरवाजा उघडला तेव्हा मी क्षणाचाही विलंब न लावता त्यांना थेट विचारून टाकलं की विल यू मॅरी मी, तेव्हा सुनीता यांनी केजरीवाल यांना सांगितलं की मी तुम्हाला नंतर सांगते. त्यानंतर त्यांनी या संदर्भात आपल्या कुटुंबाला माहिती दिली, कुटुंबाने लग्नाला परवानगी दिल्यानंतर त्यांनी देखील मला होकार दिला आणि आमचं लग्न झालं असा किस्सा या पॉडकास्टमध्ये अरविंद केजरीवाल यांनी सांगितला आहे. यावेळी त्यांनि विविध विषयांवर चर्चा केली.