बॉलिवूडच्या या अभिनेत्रीने कधीच दिला नाही बोल्ड आणि किसिंग सीन, तरीही दिले अनेक सुपरहिट चित्रपट
बॉलिवूडमधील या प्रसिद्ध अभिनेत्री कधीच दिला नाही बोल्ड आणि किसिंग सीन, ना कधीच घातले टीका होतील असे कपडे. अनेक सुपरहिट चित्रपटांना दिला नकार.
80च्या दशकातील लोकप्रिय अभिनेत्री पद्मिनी कोल्हापुरे यांनी आपल्या निरागस अभिनयाने आणि साध्या व्यक्तिमत्त्वाने प्रेक्षकांची मनं जिंकली. बालकलाकार म्हणून कारकिर्दीची सुरुवात करणाऱ्या पद्मिनी यांनी पुढे अनिल कपूर, ऋषी कपूर, राजेश खन्ना यांच्यासह अनेक दिग्गज कलाकारांसोबत काम केले.
मात्र, आपल्या ठाम तत्त्वांमुळे त्यांनी अनेक मोठ्या चित्रपटांच्या ऑफर्स नाकारल्या. 1982 मध्ये प्रदर्शित झालेल्या ‘प्रेम रोग’ या चित्रपटाने पद्मिनी यांच्या कारकिर्दीला नवे वळण दिले. दिग्दर्शक राज कपूर यांच्या या चित्रपटात त्यांनी विधवा मनोरमा ही संवेदनशील भूमिका साकारली. त्यातील गाणी आजही लोकप्रिय असून, पद्मिनी यांच्या अभिनयाचे विशेष कौतुक झाले.
या चित्रपटात राज कपूर यांना एक किसिंग सीन ठेवायचा होता. मात्र, पद्मिनी यांनी अशा प्रकारच्या सीनला स्पष्ट नकार दिला. त्यांच्या मते, अशा भूमिका किंवा बोल्ड सीन करणे त्यांना मान्य नव्हते. त्यामुळे त्यांनी आपल्या तत्त्वांशी तडजोड केली नाही.
'प्रेम रोग'च्या यशानंतर राज कपूर यांनी 1985 मध्ये ‘राम तेरी गंगा मैली’ या चित्रपटासाठीही पद्मिनी यांना भूमिका देण्याची इच्छा व्यक्त केली होती. मात्र, चित्रपटातील बोल्ड सीनमुळे पद्मिनी यांनी ही ऑफरही नाकारली. त्यानंतर ही भूमिका मंदाकिनी यांनी साकारली आणि या चित्रपटामुळे त्यांना मोठी लोकप्रियता मिळाली.
पद्मिनी कोल्हापुरे यांनी व्यावसायिक यशापेक्षा आपल्या तत्वांना अधिक महत्त्व दिले. त्यामुळे काही सुपरहिट चित्रपट त्यांच्या हातून गेले असले, तरी उत्कृष्ट अभिनय, साधेपणा आणि दर्जेदार भूमिकांमुळे त्यांनी हिंदी चित्रपटसृष्टीत स्वतःची वेगळी आणि कायमस्वरूपी ओळख निर्माण केली.
