Ahmadabad Plane Crash: एअर इंडियाचे विमान ज्या मेडिकल हॉस्टेलवर आदळलं, त्याची सद्यस्थिती काय? फोटो पाहून हादराल
अहमदाबाद येथे एअर इंडियाच्या फ्लाइट AI-171 चा भीषण अपघात झाला आहे. लंडनच्या गॅटविक विमानतळाकडे जाणारे हे विमान मेघानीनगर येथील बीजे मेडिकल कॉलेजच्या हॉस्टेलवर कोसळले. विमानात भीषण आग लागली आणि हॉस्टेलचा मोठा भाग उध्वस्त झाला.
गुजरातच्या अहमदाबादमध्ये एक मोठी आणि धक्कादायक दुर्घटना घडली आहे. गुरुवारी एअर इंडियाचे फ्लाइट क्रमांक AI-171 चा मोठा अपघात झाला.
हे विमान अहमदाबादहून लंडनमधील गॅटविकला जात होते. मात्र टेकऑफनंतर काही क्षणात ते मेघानीनगर येथील निवासी परिसरात असलेल्या बीजे मेडिकल कॉलेजच्या हॉस्टेलच्या इमारतीवर कोसळले.
हे विमान हॉस्टेलवर आदळल्यानंतर भीषण आग लागली. यामुळे सर्वत्र धुराचे मोठे लोट पाहायला मिळाले. या अपघाताची अनेक छायाचित्रे समोर आली आहेत.
यात विमानाचा मागील भाग हॉस्टेलच्या इमारतीवर पाहायला मिळत आहे. तर पुढील भाग पूर्णपणे जळून खाक झाला आहे.
हे विमान हॉस्टेलच्या ज्या भागावर कोसळले, तिथे कॅन्टीन आहे. दुपारच्या जेवणाच्या वेळी मेडिकलचे विद्यार्थी तिथे मोठ्या संख्येने उपस्थित असतात.
यामुळे या दुर्घटनेत साधारण २० विद्यार्थ्यांचा मृत्यू झाल्याची भीती व्यक्त केली जात आहे. मात्र, अद्याप याबद्दलची अधिकृत माहिती समोर आलेली नाही.
या दुर्घटनेची माहिती मिळताच तात्काळ बचावकार्य सुरू करण्यात आले आहे. NDRF च्या तीन टीम्स घटनास्थळी बचाव मोहीम राबवत आहेत.
तसेच वडोदराहून NDRF च्या आणखी दोन टीम्स मदतीसाठी अहमदाबादकडे रवाना झाल्या आहेत.
जखमींना तातडीने रुग्णालयात दाखल करण्यासाठी अहमदाबादच्या सिव्हिल हॉस्पिटलपर्यंत ग्रीन कॉरिडोर तयार करण्यात आला आहे.
अहमदाबादचे नगर आयुक्त आणि पोलीस आयुक्त स्वतः घटनास्थळी उपस्थित राहून परिस्थितीवर लक्ष ठेवून आहेत. बचावकार्याची पाहणी करत आहेत.
या घटनेत एकूण किती जणांचा मृत्यू झाला, किती जण जखमी याबद्दलची अधिकृत माहिती समोर आलेली नाही.
अवघ्या एका मिनिटात घडलेल्या या भीषण अपघातामुळे मोठी जीवितहानी झाल्याची भीती व्यक्त होत आहे.
सध्या घटनास्थळी वेगाने बचावकार्य सुरू आहे.
