पंतप्रधान मोदींवर बोलताना शिंदे गटातील नेत्याची जीभ घसरली; असं काय म्हणाले?

राज्यात एकीकडे दिवाळी साजरी होत असताना राजकीय घडामोडींना मात्र वेगेळेच वळण येत आहे, महत्त्वाची राजकीय बातमी समोर आली आहे. शिंदेंच्या शिवसेनेचे नेते आणि माजी आमदार सिद्धराम म्हेत्रे यांनी पंतप्रधान नरेंद्र मोदी आणि शेतकऱ्यांच्या आर्थिक मदतीसंदर्भात बोलताना एक वादग्रस्त विधान केले आहे. त्यांच्या या वक्तव्यामुळे राजकीय वर्तुळात चर्चांना उधाण आले आहे.

शेतकऱ्यांना मिळणाऱ्या मदतीवर बोलताना म्हेत्रे यांनी म्हटले की, “मोदींचे पैसे आले” असे वाटून शेतकरी बँकेत धाव घेत आहेत. त्यांनी पुढे तीव्र शब्दांत शेतकऱ्यांना उद्देशून म्हटले, “तुम्ही मोदी धोतर फाडेपर्यंत बँकेत पळताय, लाज वाटते का तुम्हाला?” म्हेत्रे यांनी स्पष्ट केले की, शेतकऱ्यांना मिळणारे हे पैसे पंतप्रधान मोदींच्या वैयक्तिक घरातून आलेले नाहीत, तर ते शेतकऱ्यांच्या कष्टाचे आणि त्यांनी भरलेल्या कराचे पैसे आहेत. “त्यांनी काय त्याच्या बापाचा घरचं देत नाही,” असेही त्यांनी ठामपणे सांगितले. या वादग्रस्त विधानामुळे सिद्धराम म्हेत्रे यांची जीभ घसरली असल्याचे मानले जात आहे. या प्रकारामुळे सत्ताधारी आघाडीत आणि विरोधी पक्षांमध्येही यावर प्रतिक्रिया उमटण्याची शक्यता आहे.