रविवारी मंदिरात जायचो, तिथं… भोंदूबाबा अशोक खरातच्या कथित मॅनेजरचा मोठा दावा
भोंदूबाबा अशोक खरातचा कथित मॅनेजर रमेश हिंगे हा सर्वांसमोर आला आहे. त्याने केलेल्या दाव्यानंतर राज्यात खळबळ माजली असून या प्रकरणात मोठा ट्विस्ट आला आहे. आता नेमकं काय? चला जाणून घेऊया...
नाशिकमधील लिंगपिसाट अशोक खरातबाबत अनेक धक्कादायक खुलासे होताना दिसत आहेत. त्याच्या विरोधात सात गुन्हे दाखल झाले आहेत. तसेच मुख्यमंत्री देवेंद्र फडणवीस यांनी विधान भवनात खरातच्या काळ्या कारनाम्यांची अख्खी कुंडली वाचून दाखवली. आता या प्रकरणात मोठा ट्विस्ट आला आहे. अशोक खरातचा कथित मॅनेजर समोर आला आहे.
नाशिकच्या भोंदूबाबा अशोक खरात प्रकरणात पुन्हा एक मोठा ट्विस्ट आला आहे. खरातचा कथित पीए किंवा मॅनेजर असल्याच्या चर्चेत असलेले रमेश हिंगे आज अचानक मीडियासमोर आले आणि त्यांनी सर्व आरोप फेटाळून लावले.
रमेश हिंगे यांचा मोठा दावा आहे की, “मी अशोक खरातचा पीए किंवा मॅनेजर नाही. माझा त्याच्याशी कोणताही व्यावसायिक संबंध नाही. मी फक्त रविवारी मंदिरात जात असे...”
रमेश हिंगे यांनी स्पष्ट केले की, ते पेशाने शिक्षक आहेत. रविवारी शाळेला सुट्टी असल्याने ते श्रद्धेपोटी मंदिरात स्वयंसेवक म्हणून काम करायचे. “त्या पलीकडे खरातच्या कोणत्याही अघोरी कृत्यांशी किंवा व्यवहारांशी माझा काहीही संबंध नाही,” असे त्यांनी ठामपणे सांगितले.
गुन्हा दाखल झाल्यानंतर रमेश हिंगे फरार असल्याच्या चर्चा जोरात होत्या. मात्र आज स्वतःहून समोर येऊन त्यांनी आपली बाजू मांडली आहे. पोलिस आता हिंगे यांच्या या दाव्याची सखोल शहानिशा करणार आहेत. खरातच्या ‘ओकस प्रॉपर्टीज’ आणि इतर आर्थिक व्यवहारांमध्ये हिंगे यांचा खरोखरच सहभाग होता की ते केवळ एक साधे भक्त होते, हे लवकरच स्पष्ट होईल.
दरम्यान, अशोक खरातने अवघ्या १०-१२ वर्षांत १५०० कोटी रुपयांची मालमत्ता उभी केल्याची धक्कादायक माहिती समोर आली आहे. नाशिक सायबर सेलने आता NATGRID या शक्तिशाली अॅप्लिकेशनच्या मदतीने खरातच्या बँक खात्यांचा आणि आर्थिक व्यवहारांचा शोध घेण्यास सुरुवात केली आहे.
