Chitra Wagh : कोण आहे प्रांजली मॅडम? तिला माहितीय का ही बाई इथे.. हॉस्पिटलच्या दारातच चित्रा वाघ यांना संताप अनावर
Chitra Wagh : भाजपं नेत्या आमदार, चित्रा वाघ अमरावती जिल्हा रुग्णालयाच्या पाहणीसाठी गेल्या आहेत. तिथे तीन लहान बाळांचा आगीत होरपळून मृत्यू झाला. रुग्णालयात प्रवेश करतानाच समोरचं दृश्य बघून चित्रा वाघ चांगल्याच संतापल्या.
आठवड्याच्या सुरुवातीला अमरावती जिल्हा स्त्री रुग्णालयाच्या NICU कक्षाला आग लागली. तीन निष्पाप बाळांचा आगीत होरपळून मृत्यू झाला. त्यानंतरही रुग्णालयाचा गलथान कारभार सुरूच आहे.
प्रसूतीसाठी पाच दिवसांपासून आलेल्या महिलेला ऐनवेळी सांगितलं की नागपूरच्या रुग्णालयात घेऊन जा. गर्भवती महिलेला प्रसूतीच्या कळा सुरू होताच डॉक्टरांनी नागपूरला नेण्यास सांगितलं.
रुग्णालयात बाळासाठी अतिदक्षता विभागच नसल्याने रुग्णांना त्रास होतोय.गोर गरीब रुग्णांची रुग्णालयात ससेहोलपट सुरू आहे. रुग्णवाहिका न आल्याने खाजगी वाहनाने महिलेला दुसऱ्या रुग्णालयात नेण्याची वेळ.
दरम्यान आज भाजप नेत्या आणि आमदार चित्रा वाघ अमरावती जिल्हा रुग्णालयाची पाहणी करण्यासाठी आल्या होत्या. त्यावेळी तिथलं दृश्य पाहून त्यांचा पारा चढला. एक बाई छोट्या बाळाला घेऊन रुग्णालयाच्या दारात बसली होती. तिच्यासोबत असलेला एक पुरुषाला रुग्णवाहिका मिळत नव्हती. ते चित्र पाहून चित्रा वाघ यांचा पारा चढला.
तिथल्या एका नर्सला चित्रा वाघ यांनी विचारलं, कोण बघतं इथे. नर्सने प्रांजली मॅडमचं नाव घेतलं. कोण आहे प्रांजली मॅडम?. तिला माहितीय का ही बाई इथे बाळाला घेऊन का बसली आहे?. या माणसाला सांगितलं डिझेल नाहीय. काय करायचं त्यांनी? तुम्हाला माहिती नाही, तुम्हाला माहिती नाही, तुम्हाला माहित नाही, आधी रुग्णावाहिकेत बसवा यांना. त्या गरजू रुग्णांना रुग्णवाहिका मिळवून दिली.
