संकटात परळीचं वादळ?, वाचा INSIDE STORY
दिवंगत लोकनेते काका गोपीनाथ मुंडे यांच्या हाताच्या बोटाला धरून राजकारणात आलेले पुतणे धनंजय मुंडे हे एका वेगळ्याच मुद्द्यामुळे चर्चेत आहेत. पण त्यांचा राजकीय संघर्ष तसा खडतर आहे.
जिल्हा परिषद सदस्यापासून खऱ्या अर्थाला राजकारणाला सुरूवात झाली. पुढे त्यांनी भाजपच्या युवा मोर्चाच्या प्रदेशाध्यक्षापर्यंत मजल मारली. मात्र कौटुंबिक वादातून या घराणेशाहीकडेही राजकीय नजर लागली.
गोपीनाथ मुंडे आणि त्यांचे बंधू पंडितअण्णा मुंडे यांच्यात राजकीय वाद शिगेला पोहचला. आपला मुलगा धनंजय यांना आमदार करावं अशी इच्छा पंडितअण्णा मुंडे यांची होती.
घरातच कलह निर्माण झाल्यामुळे पंडितअण्णा यांनी गोपीनाथ मुंडे यांना सोडचिठ्ठी देत हे राष्ट्रवादीत प्रवेश केला. त्यानंतर खऱ्या अर्थाने मुंडे विरुद्ध मुंडे असंच समीकरण राजकारणात तयार झाले.
2014 साली धनंजय मुंडे यांनीदेखील राष्ट्रवादीत प्रवेश करून एक नव्या राजकारणाची मुहूर्तमेढ रोवली. 2019 च्या निवडणुकीत घवघवीत यश मिळवून ते राज्याच्या मंत्रिमंडळात स्थानबद्ध झाले.
राजकारणाच्या अगदी सुरुवातीला भारतीय जनता पक्षाचे विद्यार्थी आघाडी प्रमुख म्हणून त्यांनी काम पाहिलं.
यानंतर भारतीय जनता युवा मोर्चाचे उपाध्यक्ष पद, मग प्रदेश सरचिटणीस व प्रदेशाध्यक्ष अशी अनेक पदं धनंजय मुंढेंनी पाहिली. त्यावेळी त्यांनी बेरोजगारीचा मुद्दा खूप ठामपणे प्रकाशात आणला.
यानंतर भाजपच्या युवा क्रांती रॅलीमध्ये धनंजय मुंडेंनी 15 हजार युवकांचे नेतृत्व केले.
अखेर सततच्या राजकीय नाराजीमुळे त्यांनी 2010 मध्ये राष्ट्रवादीत प्रवेश केला. त्यानंतर ते राष्ट्रवादीकडून 2013मध्ये विधानपरिषदेवर लढले.
विधानपरिषदेचे विरोधी पक्षनेते म्हणून त्यांची अनेक भाषणं आजही सगळ्यांच्या लक्षात आहेत. 2019 मध्ये विधानसभेवर निवडून आले. त्यानंतर त्यांच्याकडे सामाजिक न्यायमंत्रीपदाची सूत्रे सोपवण्यात आली.
