मुंबईतील वाय.बी. चव्हाण सेंटर परिसरात एक रहस्यमय पोस्टर झळकल्याने राजकीय वर्तुळात चर्चांना उधाण आले आहे. या पोस्टरवर मफलर घातलेल्या व्यक्तीचे चित्र असून, “अजितदादांचा अपघात की घातपात आणि यामागे असलेल्यांना वाचवणारा नेता नक्की कोण?” असा प्रश्न विचारण्यात आला आहे. या पोस्टरवर १६ नोव्हेंबरला रोहित पवारांची पत्रकार परिषद होणार असल्याचा उल्लेख आहे.

रोहित पवार यांनी यापूर्वीही अजित पवारांच्या कथित अपघातावरून सातत्याने प्रश्नचिन्ह उपस्थित केले आहे. हा अपघात घातपात असल्याचा संशय व्यक्त करत त्यांनी एफआयआर दाखल करण्याची मागणी केली होती. १६ नोव्हेंबर रोजी दुपारी चार वाजता वाय.बी. चव्हाण सेंटर येथे होणाऱ्या पत्रकार परिषदेत रोहित पवार मफलरवाला नेता कोण याबद्दल मोठा गौप्यस्फोट करण्याची शक्यता आहे. हे पोस्टर कोणी लावले हे अद्याप स्पष्ट झाले नसले तरी, त्यावरील मजकुरामुळे महाराष्ट्राच्या राजकारणात नवे वळण येण्याची चिन्हे आहेत.