कॅन्सरवरील उपचारांनंतर इतकी बदलली हिना खान; ओळखणंही कठीण
Hina Khan: प्रसिद्ध टेलिव्हिजन अभिनेत्री हिना खानचा एक व्हिडीओ सोशल मीडियावर व्हायरल होत आहे. या व्हिडीओमध्ये तिचा बदललेला लूक पाहून चाहत्यांनी आश्चर्य व्यक्त केलं आहे.
'ये रिश्ता क्या कहलाता है' या मालिकेत अक्षराची भूमिका साकारून घराघरात पोहोचलेली अभिनेत्री हिना खान सध्या सोशल मीडियावर तिच्या बदललेल्या लूकमुळे चर्चेत आली आहे. मुंबईत पापाराझींनी हिनाचा व्हिडीओ शूट करून सोशल मीडियावर अपलोड केला आहे. या व्हिडीओमध्ये हिनाचं बरंच वाढल्याचं पहायला मिळतंय. काही काळापूर्वी तिला कॅन्सरचं निदान झालं होतं.
हिनाला ब्रेस्ट कॅन्सरचं निदान झालं होतं. सोशल मीडियावर पोस्ट लिहित आणि व्हिडीओ शेअर करत तिने तिच्या प्रवासाविषयी सतत चाहत्यांना सांगितलं होतं. उपचार सुरू असतानाही हिनाने तिचं काम थांबवलेलं नव्हतं. कॅन्सरवरील उपचारांनंतर हिनाचं बरंच वजन वाढलं आहे.
कॅन्सरवर यशस्वीरित्या मात केल्यानंतर हिनाने बॉयफ्रेंड रॉकी जयस्वालशी लग्न केलं. जून 2025 मध्ये हिना आणि रॉकीने गुपचूप लग्न उरकलं होतं. त्यानंतर या लग्नाचे फोटो त्यांनी सोशल मीडियावर पोस्ट केले होते. कॅन्सरशी लढा देण्याच्या या संपूर्ण प्रवासात रॉकी तिच्या बाजूने खंबीरपणे उभा होता.
एका कार्यक्रमात हिना तिच्या कॅन्सरच्या लढ्याविषयी म्हणाली होती, “ज्या रात्री मला कॅन्सरबद्दल समजलं, तेव्हा माझा पार्टनर माझ्या घरी आला होता. मला डॉक्टरांनी कॉल केला नव्हता. रॉकीने (बॉयफ्रेंड) सांगितलं की मॅलिग्नंसी आहे, रिपोर्ट्स पॉझिटिव्ह आहेत. दहा मिनिटांनंतर मला आठवलं, रॉकी घरी येण्याआधी मी माझ्या भावाला सांगत होती की मला आज फालूदा खायची इच्छा होतेय. मला समजलं की घरात गोड पदार्थ आला आहे, चांगलंच असेल. या गोष्टीकडे सकारात्मकतेने पाहुयात आणि चला काहीतरी गोड खाऊयात, असं म्हटलं.”
हिना खानने 'ये रिश्ता क्या कहलाता है', 'कसौटी जिंदगी की 2' यांसारख्या मालिकांमध्ये आणि बिग बॉस या रिअॅलिटी शोमध्ये काम केलं आहे. टेलिव्हिजनवरील आघाडीच्या अभिनेत्रींमध्ये तिचं नाव आवर्जून घेतलं जातं. नुकतीच तिने रुबिना दिलैकच्या चॅट शोमध्ये उपस्थिती लावली होती. या शोमध्ये ती तिच्या खासगी आयुष्याविषयी मोकळेपणे व्यक्त झाली होती.
