महाराष्ट्र शासनाचा मोठा निर्णय! 391 कोटींचा निधी मंजूर, एसटी महामंडळ कर्मचाऱ्यांची दिवाळी गोड

महाराष्ट्र राज्य मार्ग परिवहन महामंडळाच्या (एसटी) कर्मचाऱ्यांसाठी एक अत्यंत महत्त्वाची आणि आनंदाची बातमी समोर आली आहे. कर्मचाऱ्यांच्या दिवाळीपूर्व वेतनाचा मार्ग आता पूर्णपणे मोकळा झाला आहे. राज्य शासनाने एसटी कर्मचाऱ्यांच्या दिवाळीसाठी विशेष निधी मंजूर केला असून, यासाठी ३९१.०२ कोटी रुपयांचे वाटप करण्यात येणार आहे. या निर्णयामुळे एसटी महामंडळातील सुमारे ८३ हजार अधिकारी आणि कर्मचाऱ्यांची दिवाळी अत्यंत उत्साहात साजरी होणार आहे. त्यांचे प्रलंबित वेतन दिवाळीपूर्वीच मिळणार असल्याने कर्मचाऱ्यांमध्ये समाधानाचे वातावरण आहे.

राज्याचे परिवहन मंत्री प्रताप सरनाईक यांनी या निधी मंजुरीसाठी सातत्याने पाठपुरावा केला होता. त्यांच्या अथक प्रयत्नांना यश आले असून, याचा थेट फायदा एसटी कर्मचाऱ्यांना होणार आहे. दिवाळीपूर्वी हा निधी मिळाल्याने कर्मचाऱ्यांच्या आर्थिक अडचणी दूर होऊन त्यांना सणाचा आनंद घेता येणार आहे.